VC/LC inthlan sawn hmaah sawrkarin ngaihtuah kim lo – AAP Mizoram

VC/LC inthlan sawn hmaah
sawrkarin ngaihtuah kim lo
– AAP Mizoram
Sawrkarin village council leh local council inthlan a sawn hmanaah a ngaihtuah kim lo hle tih Aam Aadmi Party chuan an sawi.
AAP Mizoram president Andrew Lalremkima chuan VC leh LC inthlan sawn hma a nih chhan mumal sawi tur awm lo chu mak an tih thu a sawi a. Sawrkar chu inthlan an sawn hma chhan mumal tak mipui hrilhhria se a duh tih sawiin, chhan mumal sawi tur an hre lo a nih chuan mipui zahlohna lian takah an ngai dawn tih a sawi.
Sawrkarin VC/LC inthlan a sawn hma danah leh inthlan ni atana February 12 a ruahmanah ngaihtuah kim loh a ngah tih AAP hruaitu hian sawiin, Mizoram puma zirlai exam-pui, promotion exam neih thla a ni a, MBSE hnuaia HSLC leh HSSLC Board Exam inbuatsaih tul vang leh exam tan hun lai a nih dawn avangin zirna in leh zirlaite chungah a chhe zawngin nghawng a nei thei dawn nia an ngaih thu a sawi a ni.
“Zirlaite tana hun pawimawh tak nena insubuai zawnga inthlan ngai turah hian zirtirtu, election BLO atan ruat an nih thin avangin zirna in leh an enkawl zirlaiten an tuar ngei ang tih hi sawrkar hian a hmu thiam lo nge a hmu duh lo tih hi kan zawhna a ni,” Andrew Lalremkima hian a ti.
Polling station atan veng/khua tinah school hman thin a nih avangin zirlai leh zirtirtuten buaina nasa tak an tawk dawn tih pawh sawiin, kuminah Board exam hi kumdang zawng aia tih hma a nih tawh laiin, Lc/VC inthlan avangin ni 7-in exam hi sawn hma leh a ni a, zirlaite tan inbuatsaihna a tlem phah hle tih a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More