VC/LC rorel dana lungawiloten Ombudsman-ah an zualko thei

VC/LC rorel dana lungawiloten
Ombudsman-ah an zualko thei
Local body – village council leh local council rorel dan leh hmalak dana lungawiloten zualko theihna Ombudsman an nei a. Lungawilohna thlen tur tan zawm tur erawh a awm.
Ombudsman (independent local body) hi mipuiin khawtlang roreltute – village council leh local council (VC/LC) rorel dan, kalphung leh hmalak dana sawisel/ lungawilohna thlena an zualko theihna turin Mizoram sawrkarin Act & Rules mumal tak siamin a din a. Mipuiin tangkai zawka an hman theihnan lungawilohna (complaint) thlen theih dan tihchhuah a ni.
Ombudsman hnena complaint thehluh hma in civic authority (Municipal Council/ Local Council/ Village Council) hnenah lungawilohna thu thlen hmasak phawt tur a ni a. Khua leh tui leh mi tupawhin local body – VC/ LC hnena lungawiloh thu a thehluh atanga thla khat ral hnuah, complaint thehluh a ni chung pawha chhanna hmuh a nih loh emaw chhan leh vang mumal awm loa an lo pawm lo a nihin emaw local body chhannaah a lungawi tawk lo a nih chuan, Ombudsman hnenah complaint a thehlut thei a ni.
Mi tu pawh local body laka lungawi lohna a neih chuan, amahin emaw a aiawh zo ngei tura a ruat hmangin ziakin Ombudsman hnenah complaint a thehlut thei a. Complainant emaw a aiawhin emaw complaint chu Ombudsman hnena a thehluhin, a hming, address leh local body office hming leh hnathawktu thawhna local body, a complaint chhan ziakin, lehkha tanchhan a neih ang ang thil tel bawk tur a ni tih a sawi. Ombudsman hian UD&PA Sanitation office Sikulpuikawn-ah office a nei a ni.