District Disaster Management Authority (DDMA) Khawzawl hmalaknain State Disaster Response Fund (SDRF) kaltlanga lei kangthelhna, fire extinguisher chu Thawhlehni khan sem a ni.
DDMA Khawzawl chairman, district bawrhsap CC Lalchhuangkima chuan kangmei laka inven chu mitin mawhphurhna a ni, tiin, hemi kawngah hian khawtlang hruaitu village council-ten mawhphurhna an neih thu a sawi. “Khua a lo ro leh tan dawn a, in leh ram kang a awm lohna turin mahni veng leh khua theuhah tan kan lak a ngai takzet a, tun hi bultannaah hmang ang u,” a ti.
-- Advertisement --
Kangmei a chhuah thulhah awmze nei taka hma lak a tul thu leh roreltu leh mipui thununtu awm a tul thu sawiin, Village Level Disaster Management Committee kutah hna pawimawh tak hi a tla lo thei lo tih DDMA chairman hian a sawi a. Fire extinguisher hman dan inzirtirna chu ngun taka ngaihven a, kangthelhna hmanrua sem chhuah chu tul loa hmang loa, mamawh hun taka hman a nih theih na’n ruahmanna siam turin a chah.
VC-te hnena fire extinguisher sem rualin a hman dan tur zirtir nghal an ni a. Quick Response Team Khawzawl DC office-in rikrum leh chhiatna thlen thulha chhanchhuahhna kalpui dan, Emergency Rescue Operation an entir a. VC-te hi tih tir chhin an ni.
Fire extinguisher kg.4 a rit hi Khawzawl district-a VC awm zawng zawng 38 hnenah pakhat theuha sem a ni.