VC term pawh tawi khinna hnawl Hnawl loh turin khing zui leh dawn
Mizoram sawrkarin village council term kal mek a pawh tawi avanga All Mizoram Village Council Association-in High Court-a a khinna chu dan tlawhchhan hmangin hnawl a ni a, danin a phalsak angin sawrkarin hi khin zui tum tho a ni.
The Aizawl Post thudawn danin, Mizoram sawrkarin village council term dinglai a pawh tawi vanga lungawi lo, All Mizoram Village Council Association (AMVCA) in Gauhati High Court Aizawl Bench-a sawrkar a khinna chu Thawhtanni khan AMVCA ukil-te hian court-ah an thehlut a, Court hian a lo hnawlsak.
A hnawl chhan hi, All Mizoram Village Council Association hi sawrkar hnuaiah ‘registration of firms’ hnuaia inziaklut lo a ni a, sawrkara inziaklut lo pawl hi court chuan an thu leh hla a lo dawngsawng thei loa, an duh chuan mimal anga sawrkar khinna thehlut turin a lo rawn a ni.
Hemi hma hian AMVCA chuan High Court-ah hian sawrkar khinna thehluh a lo tum tawh a, Mizoram sawrkarin VC term dinglai thla 6 chuanga a pawhtawi thu ah, writ petition an thehluh chu Court hmaah ngaihtuah tura chhawp chhuah ni mah se, sawrkarin notification a chhuah nawn chu khin tel a ngaih avangin Court phalna in hnuhlet a lo ni tawh a. Siamrem ngaite an siamthat hnuah AMVCA ukilte hian thehlut nawn leh nghal tum mah se, kum thar (2025) lama bawhzui turin thu an dah ta zawk a ni.
Hemi bawhzui hian kum 2025 atana High Court inhawn ni – January 13 khan AMVCA ulik-te hian petition hi an thehlut a, AMVCA hi sawrkar hriatpui pawl a lo nih loh avangin court chuan dan angin a lo dawngsawng thei lo tih sawi a ni a. An duh chuan VC member zingah mimal angin khin zui theih a nih thu pawh lo hrilhin, hemi ang hian mimal anga khin zui tumin document tulte an lakawm a, hma an la zui tih thu dawn a ni.
Sawrkara register an nih loh hi a tirah hre sa tho mah se, court hian hnawl phahna atan a lo hman loh palh takin tiin petition hi an thehlut lui a, a lo hnawl phah ta tho tih sawi a ni.
AMVCA president K Lalngaizuala chuan AMVCA hi kum 1986-a din ni tawh mah se, dan ang takin sawrkarah an in-register loa, hei vang hian an ukil-te nen inberawnin, inhnuhdawh leh phawt a, a tharin thehluh that leh an tum tih a sawi a. AMVCA member-ten inlungrual takin hma an la zel dawn tih a sawi a ni.
Mizoram sawrkar chuan 2024 November 20 khan hriattirna tichhuakin, village council term dinglai, 2025 September-a tawp tur chu 2025 February 19-a tawp turin a pawt tawi. Sawrkar hriattirna tih chhuah hi AMVCA-in a khinlet zinga a tel laiin, sawrkar hian 2024 November 21 khan hriattirna dang tichhuakin, hemi hmang hian 2024 November 20-a hriattirna lo tih chhuah tawh chu luanlantir nghal a ni. Hriattirna tih chhuah thar zawk hi a copy pek an nih ve loh avang leh social media lamah pawh hmuh tur a awm loh avangin High Court-a lehkha an thehluhah dt.20.11.2024 notification chauh an thehlut a, notification thar tihchhuak hi sawrkar ukil-ten court-a lehkha an thehluh atanga an hmuh ve chauh avangin, he notification khing tel tur hian an writ petition thehluh chu an hnukdawk ta tih AMVCA president hian a lo sawi tawh a ni.