Veng phuarkhawmtu tha infiamna – Nursery Vengah(Lalnunsiama Memorial Under 14 & 18 Basketball Tournament 2025)
Veng phuarkhawmtu tha infiamna – Nursery Vengah
(Lalnunsiama Memorial Under 14 & 18 Basketball Tournament 2025)
Aizawl khawpui hi han thlir ila, thalai leh kum naupang te te ruihhlo in a bawhbuai avanga kawngsira rui muthlu buk buk lainatawm tak tak hmuh tur an tam hle – ram a rum a, kohhran leh khawtlangin thinlung leihbuain tawngtai maicham kan kil mek a nih hi! Mizo mipa thi nasa lutuk te hi manganthlak tak a ni!
Heng karah hian sikul chawlh a lo ni a, naupang mai bakah thalai tam tak chu anmahni pindanah tawmin computer/mobile games an khel a, nun a bawrhsawm hle a, humsual daina remchang a tam hle. Ni enga pawn boruak hrisel hip peih lo leh insawizawi peih lo rilru sawngnawi, mi dang pawisawi kawnga tha za zek zek emaw tih mai tur kan pung tual tual!
Mimal thahnemngaihna leh khawtlang tangrualin hetiang chhum dum pik inzar phui mup mup karah hian Nursery khawtlangah hmalakna thawm duhawm a awm a, zirlaite sikul chawlh denchhenin he vengah hian kum 14 leh 18 hnuai lam tan basketball intihsiakna buatsaih a ni a, an khawtlangin he inelna hi an hlutin mipui a hipkhawm tha hle.
Naupang chumchiap zawk tan exhibition match an buatsaih bawk a, rualelna rilru leh chhelna kum naupang te an nih lai atangin an rilruah tuhin a awm der! He veng hi Volleyball thiam leh uar veng an ni thin a; amaherawhchu, tun dinhmunah erawh an vengah hian basketball hmangin khawtlang an insuihzawm mek a – he inelna buatsaihtu Lalnunsiama (Asiama) chhungte pawh hian Asiama hriatreng nan tun dinhmuna an khawtlang phuarkhawmtu basketball lam hi awn zawkin, inelna hi an buatsaih a ni.
Mizoram pumhuap, district leh AMC ward angin intihsiakna hi buatsaih ni thin mah se – a thei leh thiam bik te tan lo chuan tel ve a theih ngai loh! Chuvang chuan hetianga tualchhung bila kan tunlai Zoram dinhmun hre chunga hunawl hman that theihna tura kawng sial hi hlamchhiah chi a ni hauh lo – Nursery veng hian ruahmanna awmze nei an siam thiam hle.
Lalnunsiama Memorial Under 14 & 18 basketball tournament 2025 butsaihtu Lalnunfima chuan, “Kei hi Pro volleyball player niin, ka unaupa Asiama pawh hi volleyball player ni mah se, tun dinhmuna kan khawtlangin basketball kan tuichilh zia hriain he inelna hi kan buatsaih a ni” tiin The Aizawl Post Hoops Mania media partner an nei leh khawtlangin an inelna buatsaih an hlut chu lawmawm a tih thu a sawi bawk.
Nursery vengah hian an veng pa Atluanga chuan basketball academy changtlung tak kalpui mekin, hei hian nasa takin vengchhunga basketball a than theihna tur leh naupang zawk ten rahbi dik an zawhna turin nasa takin a pui a ni.