Veng tina special police officerawm theih dan kan zawng mek: Chief minister

Ruihhlo do kawngah tlawmngai pawlten mi dap leh man theih ngawtna dan an neih loh avangin hemi awm theihna atan Police Act atangin special police officer neih dan an dap mek tih chief minister Lalduhoma chuan a sawi.

Central YMA hnuaia ruihhlo do pawl - Central Anti Drugs Squad (CADS) in tunhnaia ruihhlo an man an tihral a hmanpuinaah chief minister chuan ruihhlo do kawngah tlawmngai pawlte an thawhhlawk a, chutihrualin mi in, huan, lirthei leh anmahni dap theihna emaw man theihna emaw an neih loh avangin harsatna a awm thin tih a sawi.
Sawrkar kutke pawimawh an nih si avangin hemi atan hian dan awm thei ang an zirchiang a, Excise Act-ah chutianga tih theih a nih loh avangin Police Act-ah zawk a awm theih dan awmin an hria a, Home department-in an buaipui mek tih a sawi.
“Special police officer atan hian a tuimi, a veng mi thlangchhuak ila, an ni hian mi dap leh man theihna thlengin thuneihna an nei thei anga, police tak takte nen thawkhoin, ruihhlo do kawngah hma kan la chak thei ang. Hei hi tihpuitlin theih a nih chuan tuna volunteer-a mahni lirthei nen insengsoa, ei leh in intum chawp ngai, a sur a sa hnuaia tlawmngaia thawhchhuah ngai ti tlemin, chawlhbuk leh senso mamawh hrang hrang thlengin kan inphuhruk sak thei dawn a ni,” a ti.
Mob rule a awm thin rualin, Mizo hnam chuan pipute atangin ziak loh dan kan nei a, khawtlang tana hnawksak leh buaipui awm chu lal leh a upate thu angin ‘Tlang sawi’ tawk an awm thin bakah ‘Phungin a velh’ pawh an awm thin tih Lalduhoma hian sawiin, “Sawrkar a inrawlh vek seng loa, he kan ziak loh dan hi hman tangkai a ngai; hmingchhiat theih a nih avangin fimkhur erawh a ngai,” a ti.
Chhungkua leh khawtlangin tihngaihna an hriat tawh loh dahkhawm lailawkna tur kan nei loa, neih a tul zia chu tunhnaiah tum hnih kan hmu tawh tih a sawi. Hetiang, nachhawk tur ang chi bakah skill training an neih a, certificate nei thlapa eizawnna bul tan pui dan dap pui an ngai tih sawiin, chumi tur chuan tlawmngai pawl, kohhran leh mimal PPP mode-a thawhpui tur an duh reng a, sawrkar chu an mamawh tumtu-ah a tang chauh dawn tih a sawi a ni. 
Tun tuma CADS-i a man ruihhlo tihchhiat hi Excise & Narcotics leh Police hnena an hlan bak, a tam zawk hi chu a neituten an tlanchhiat san, case siamzui ngaihna awm vak lo te niin, kumin March 15 atanga June thlenga an man a ni. Heroin, methamphatimine, ruihna atana damdawi mum leh a tui chi bakah ganja leh zu niin, a vaiin cheng nuai 429 hu vel a ni.