Sunil-a’n clap pull-up record a siam

Nepali callisthenics athlete Sunil Khadka, kum 25, chuan kum 10 chhung record ding tawh, minute khat chhunga clap pull-up tihnem thei record a rawn khum ta a, minute khatah clap pull-up vawi 32 a tihman a, a hmaa hetiang record chu December 2015-a US-a Blake Austin siam niin, ani hian minute khatah clap pull-up vawi 30 a ti thei ve thung.
Clap pull-up hi pull-up tihdan pangngai bakah kut ben a tel a. Chunglama bar khamah ke lei tawk lovin ban mar atin an uai a, chutah kiu-ah ban tithlepin an inpawt kang a, bar kham chungah an khabe an dah chhuak a, chutah bar-a an uaina chu thlahin, kut vawi khat an beng a, leia an tlak hmain bar-ah uai leh hman tur a ni.
Galchi, Dhading a cheng, Khadka hian June ni 21, 2025 khan record hi a siam a, a record siam hi Guinness pawhin an pawmpui tawh. Record hi Bajra Nanita’s Fitness, Lalitpur-ah a siam a ni.