Venghnuai-in Dinsanga lawmpui

Venghnuai-in Dinsanga lawmpui
WBC Youth World champion Laldinsanga chu a awmna veng Venghnuai chuan Thawhtanni khan lo hmuakin khawtlang huapin lawmpuina hun an hmang.
Venghnuai Local Council kaihhruaiin hman a ni a, tlawmngai pawl hrang hrang – YMA, MHIP, MUP leh Dinsanga Fans Club ten lawmpuina thilpek an pe a. Laldinsanga chuan zirlai mai a la ni a, 1st year BA a zir mek tih a sawi. Zirlai ni chungin boxing training a la reng a, a awmna veng, Venghnuai mipuiin a tlin lohnaa an enrem thin avangin a lawm hle tih a sawi a ni. “Vawi engzat nge ka chak loh tawh ka chhiar thei loa, bansan loh hi hlawhtlinna a ni,” a ti.
World Youth champion Laldinsanga coach Sete-a chuan Dinsanga tumruh zia sawiin, zirna leh sport a kalkawp pui a, vengchhung tan hun a neih loh pawhin veng mipuiin enremna mit nena an en a tul tih tih a sawi a ni.
He hun hi MPCC treasurer Dr Lalmalsawma Nghaka’n a hmanpui a. Laldinsanga hi world ranking 120-na vel a ni a, tuna Youth Champion a nih hnuah top 80 a kai beisei a ni a. Top 20 vel a thlen hunah World champion a khel tawh dawn a. A tum ram a thlen theihnan Pathian awmpuina a mamawh hle dawn a, vengchhung mipui leh Zoram mipui tawngtai pui a ngai hle dawn tih a sawi a ni.