Venzuela in Essequibo neih let leh tum

Venezuelan te chuan oil a hausa tak territory a thenawm Guyana in a thunun chu neih let leh an tum. Mipui 95% vel te chuan Essequibo ah state thar din ni se an ti a.
Caracas chuan helai region hi kum 200 kaltaa Spain atanga a indan tirh atangin Venezuela region ni tawh a ni a ti a. Mahse, Guyana chuan kum zabi 19 lai khan British Guiana hnena pek a ni a ti ve thung.
He hmun inchuhna hi kum 2015 khan oil hmuhchhuah a nih hnuah a nasa zual leh ta bawk a.
President Nicolas Maduro chuan referendum result chu Venezuela pum tan hnehna a ni tiin a sawi a.
Essequibo hi 159,500 sq km (61,600 sq miles) niin a ram hmun thuma thena hmun hnih chu Guyana thunun niin mipui pawh thahnem tak chenna a ni.
Helai region hi ram pahnih te inchuh leh intihbuai rengna a ni a.
Kum 1899 khan international arbitral tribunal chuan he terriroty hi Britain hnenah a hlan a, chutihlai chuan Guyana awptu niin mahse a hnuah Venezuelan sorkar chuan kha ruling kha a dik lo an ti ve thung.
Kum 1966 khan Guyana chuan independence hmu in, Britain leh Venezuela chuan buaina chinfel nan enho ni se an ti a, mahse, kum sawmruk hnuah pawh resolution siam a ni thei ta chuang lo.
Kum 2015 khan Essequibo coast ah US oil giant ExxonMobil te chuan oil an hmuchhuak a. Kum 2018 khan an ram a ni tiin Guyana chuan International Court of Justice (ICJ) ah 1899 tribunal thutlukna chu a ding chang em tih enfiah turin a ti a, ICJ in ruling a la siam lo.
Venezuela chuan he issue ah hian ICJ thutljukna chu a pawm lo va, mahse, court hearing neihnaah erawh a la tel ve zel thung a.
Kumin September thla khan boruak sosang leh zualin Guyana chuan Essequibo tuipuiah exploration license oil company te hnenah auction in a kalpui bawk a.
Referendum ah voter te chu zawhna an zawh zingah Venezuela in Essequibo a ram anga a chhal chu i pawm em tih leh sorkarin ICJ thutlukna a pawm duh lo chu i pawm em tih te a tel a. Hei bakah hian Essequibo chu Venezuelan map ah telh i remti em tih te pawh a tel a ni.
Guyana erawh chuan Venezuela referendum chu an dem thu sawiin hetihlai hian ICJ chuan Venezuela chu Essquibo status quo tidanglam thei zawnga chet la hauh lo turin a ti zui bawk.
Sawiseltute chuan referendum lak chu Venezuelan President Nicolas Maduiro-an kum 2024 inthlanna awm hmaa nationalist boruak tihlen a tumna tiin an sawi ve bawk.