Veteran Cricket Tournament

June ni 17 atanga July ni 1, 2024 chhunga khelh tur 1st Veteran Cricket Tournament khuhhawnna chu June ni 11, Thawhlehni zan khan huaihawt niin, Aizawl khaw pawn atanga team pathum inlan tur nen team 25 tel tur aiawh pahnih theuh an kalkhawm.
Veteran team aiawh pungkhawmte hian an lunglen thu leh heti ang tournament huaihawt a nih chungchangah Cricket Association of Mizoram (CAM) hruaitute an fak a, an chungah lawmthu an sawi.
CAM president leh organising committee chairman ni bawk Lalrochuanga Pachuau chuan tournament huaihawt a nih chhan sawi chungin, CAM-in tun dinhmun a thlen theih chhan leh tuna player-te’n sum tam tak an lakluh theih chhan chu chawibelha cricket lo awinung hram hramtu hranghluite vang a nih thu a sawi a, tun hi hranghluite tana cricket-in a peklet ve hun a nih thu a tarlang tel.
CAM joint secretary leh organising committee member ni bawk Lalfakawma Vartein report pein, tournament buatsaih dan tur leh inkaihhruaina bakah tul dang a sawi.
CAM secretary P. Lalremruata pawhin thu sawiin, veteran tournament hian cricket a tihnun thar lehzual tur thu a sawi a, an hlawkpui ngei a rin thu a sawi bawk.
Tournament khuhhawnna hun hi Kros Lalnunpuia leh Jay Lalremruatate’n kaihruaiin, CAM treasurer Lalrothuama’n lawmthusawi leh tawngtaiin a khar.
He hunah hian tournament pawh fel nghal a ni a, team tin aiawh leh CAM OB-te’n intum tur an pawt.
Veteran tournament-ah hian match tinah team khelte’n cheng 10,000 zel an hlawh ang a, man of the match-in cheng 1000 zel an dawng ang.
Champion team kutah Rs. 60,000 lutin, runners up team dawn turin cheng Rs. 30,000 dah a ni.
Team tinte hi jersey tumsak vek an ni dawn a, final ni-ah ruaitheh a ni bawk ang.
T20 format-a khelh tur niin, knockout tournament a ni ang.