Victoria’s Secret Fashion Show an nei leh ta

Victoria’s Secret Fashion Show an nei leh ta
Kum ruk vel zet an chawlh vang vang hnuah khawvela fashion show thawm nei lian ber ni thin Victoria’s Secret Fashion Show chu an rama Thawhlehni zan, keini tana Nilaini tuk khan an nei leh ta a, supermodel rual an inlan leh ta suau suau a, Gigi leh Bella Hadid te unau, Irina Shayk, Ashley Graham, Candice Swanepoel, Adriana Lima, Alessandra Ambrosio, Behati Prinsloo, Barbara Palvin, Doutzen Kroes, Jasmine Tookes leh Josephine Skriver te pawh an tel a, Kate Moss leh a fanu Lila Moss te pawh te pawh inlanin, nufaa he fashion show a a ruala inlan thei awm chhun an la ni a, Carla Bruni, kum 56, pawh inlanin, Victoria’s Secret show-a model inlan thei upa ber record a siam bawk. Carla Bruni hi 2008-2012 a French first lady te pawh lo ni tawh, French President hlui Nicolas Sarkozy nupui niin, ram khat first lady lo ni tawh zinga Victoria’s Secret show-a inlan thei hmasa ber a ni bawk.
Victoria’s Secret hi hmeichhe hnuailam thuam siamtu lar leh hriathlawh an ni a, British supermodel Kate Moss hi a vanglaia khawvel huapa model hriathlawh ber te zinga mi ni thin mah se tun hi Victoria’s Secret tana a inlan vawi khatna a ni a, a fanu, kum 22 mi, Lila Moss nen an inlan dun.
Bella Hadid pawh modeling kum hnih a chawlhsan hnuah VS tan a rawn catwalk leh ta a, Hollywood star Bradley Cooper-a chhas hlui, 2009-a Cristiano Ronaldo nen pawh lo in-date ve ran tawh Irina Shayk pawh inlan lehin, ani hi 2016 khan naupai chungin he show-ah hian a lo inlan tawh bawk a ni.
Kumin hian VS hian an collection huang zauhin, plus size (mi thau deuh ho ti mai ila) pawh a vawi khat nan an titel ta a, model chawm deuh bat mai Ashley Graham pawh inlanin, ani hian VS-in plus size lama huang an zauh avang chauha he show inlan ve remti hi niin a insawi. Graham hi America’s Next Top Model show host thin a ni.
Supermodel Tyra Banks, kum 50, pawhin kum 20 dawn hnuah a vawi khat nan VS Fashion Show runway a rawn mawi ve leh ta a. 2005 khan modeling a chawlhsan tawh a, America’s Next Top Model show a buaipui a, kum 20 dawn mipui hmaah catwalk tawh lo mah se a thiam a la theihnghilh lo nasa! Tyra Banks hi 90s vel khan VS tan a lo inthehthil tawh thin a, VS Fantasy Bra hatuah pawh tum hnih tang tawhin, VS show-ah vawi kua a inlan tawh bawk a ni.