Viksit Bharat hnuaiah thalaite cho chhuahna tur kalpui dawn

Viksit Bharat hnuaiah thalaite
cho chhuahna tur kalpui dawn
Sawrkar laipuiin ‘Viksit Bharat’ (Developing India) a kalpui turah thalaite tih hmasawn leh hruaitu atana chher chhuahna turin inelna leh hun tha buatsaih sak an ni dawn. A duh duh tan tel theih a nih angin Mizo thalai tel tura sawm an ni.
Youth Services department deputy secretary Marilyn Rualzakhumthangi hoa State NSS Cell hotute sawi danin, Union Youth Affairs & Sports minister Dr Mansukh Mandaviya chuan ‘Viksit Bharat Young leader Dialogue’ tih program a puang a. 2025 January 11 & 12 ah National Youth Festival neih tur niin, Prime minister-in Bharat Mandapam Delhi-ah young leader mi 3000 vel a kawm dawn a ni.
He programme tum ber chu, thalai kum 15-29 inkar, ram pum huapa thalai fingfel zawk vaibelchhe khat tal inthlunzawm pui a, ‘Developing India’ challenge-a preliminary round atanga Delhi-a main event neih tura an tel ve theuh theihnana hma lak a ni tih an sawi.
Viksit Bharat challenge round 1-na November 25 atanga December 5 inkara hian ram pum huap digital quiz competition neih a ni dawn a, thalai kum 15-29 inkar a duh tan tel theih a ni. Mera Yuva Bharat (My Bharat) platform atanga host a ni anga, he round-ah hian ‘India’s Landmark Achievements’ tih thupui hmangin a telte hriatzauna fiah a ni dawn a ni.
Quiz intihsiaka chakte hian round thum dang paltlang tur an la nei dawn a; essay/blog inziahsiak a ni ang. State level ‘Viksit Bharat Vision’ presentation neih a ni anga, hemi zawh hian national championship neiin, state level-a tithate hi Delhi-a ram pum huap intihsiakah an tel dawn a ni.
Viksit Bharat challenge-ah hian district leh state level science exhibition, painting, cultural lam intihsiak leh thusawi intihsiak; sumdawnna, infiamna, agriculture leh technology lama mahni line theuha mi chungnung leh thiambik tan inelna buatsaih a ni dawn a ni.
Viksit Bharat Young Leader Dialogue – National Youth Festival 2025 hi My Bharat platform-ah en theih dawn tih an sawi bawk.