Villa in Rashford an la lut

English Premier League-ah pariatna ni mek leh Champions League last 16 khel tura tling chiang tawh, Aston Villa chuan Manchester United winger Marcus Rashford chu loan in an la lut fel.
Aston Villa hian United-a tlatlum tawh lo Rashford hi tum season chhung atan an hawh phawt ang a. A ngheta an la zui duh a nih chuan £40m sengin an la lut zui thei dawn. United chuan Rashford hi chhuahtir hrim hrim an duh a ni ber a, hei hian loan a hawhtu Villa a chhawk zangkhai dawn viau. Villa hian Rashford hawh man (loan fee) an sen a ngai dawn lo a ni mai lova, United hian Rashford hlawh 75% zet an tumsak cheu dawn bawk. Hetiang anga player tha tak Rashford te ang lak luh theih hi Aston Villa tan chuan ‘Pheichham man’ ang hial a ni thei ang.
Aston Villa forward thar Rashford chuan dawrtu a neih neuh neuh karah Aston Villa zawm chu duhthlanna siam awlsam tak a nih thu a sawi a. An manager Unai Emery hmathlir leh season kal meka an khelh dan chuan a hip tak zet thu a sawi a. Football khelh a duh a, Villa tan bul tan vat vat a chak thu a sawi tel bakah indawrna a hlawhtlin theih tak vangin United leh Villa chungah lawmthu a sawi tel bawk.
Inrinni zan khan Villa hi table hnuai lama awm mek Wolves lakah si hnih faiin an tlawm a. Wolves laka an tlawm hnuin manager Unai Emery chuan player thar an mamawh thu a sawi. United atanga England winger Marcus Rashford an lak luh bakah hian Spanish full-back Andres Garcia (Levante) leh Netherlands forward Donyell Malen (Borussia Dortmund) an la lut tawh a. Hetihlai hian Colombia striker Jhon Duran chu Saudi Pro League club Al-Nassr-ah £71m in an hralh a. Fenerbahce hnenah centre-back Diego Carlos chu £8.45m vel bawrin an hralh tawh bawk. Arsenal in lak an tum England striker Ollie Watkins chuan inrinni zan khan hliam a tuar a. Pau Torres leh Tyrone Mings te an inhliam vangin central midfielder Boubacar Kamara chu centre defence-ah loh theih loha an chhawr a ngai tlat bawk.
Old Trafford atanga inpuchhuak ve ta Marcus Rashford hian kum sarih mi lek a nih laiin United hi a zawm a. United academy atanga inzirchhuak ngat ni in United thinlung pianpui mi a ni. Red Devils tan hian inelna hrang hrangah vawi 426 a khel a, goal 138 zet a thun tling tawh. Manager thar Ruben Amorim hnuaiah bul a tan chhe lo viau nghe nghe a. Amorim hnuaiah hian 35% vel chiah a khel nain United player zingah amah aia goal thun tam pathum chauh an awm. Manager thar Amorim hnuaiah bul tan chhe lem lo viau mah se inhmuhthiam lohna lian tak an nei ta tlat thung. United in inkhel pawimawh tak an hmachhawn dawn hnai, nawmsip bawl phal tawh loh hunah Rashford hi nuam tawlin a lo teihawi vel a ni tih hriat a ni a. Hemi chungchang hi manager Amorim chuan zawtin a titi pui a, Rashford hian Amorim hi thu dik lo a hrilh niin sawi a ni a. Hemi hnu hian Amorim chuan Rashford hi a chhawr zui ta mang lo va, inkhel an hmachhawn hnuhnung vawi 12 zetah vawi khat chiah Rashford hian United squad-ah hmun a chang.
Forward tlan chak leh goal thun thei Rashford hian United-a a mangchhia leh a hun thim tawn mek thingthla a, chona thar hmachhawn turin Aston Villa a zawm ta a ni a. England tan vawi 60 zet khel tawh Rashford hian siamtharna a chan theih ngei a beiseiawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More