Village People frontman leh ‘Y.M.C.A.’ phuahtu Victor Willis a thi

Village People frontman leh ‘Y.M.C.A.’ phuahtu Victor Willis a thi
Costumed disco band Village People dintute zinga mi leh hlaphuahthiam, hla hlui chuai thei lo ‘Macho Man,’ ‘In the Navy’ leh an hla hit ‘Y.M.C.A.’ phuahtute zinga mi ni bawk Victor Willis, kum 74, chuan an rama June ni 30 khan chatuan ram a pan ta a, US President Donald Trump pawhin a ui thu social media lamah a post ve nghal bawk.
Victor Willis hi Village People group-a police officer leh lawng sipai uniform vela inthuam thin kha a ni a, an group hi dangdai deuh tak taka inthuam thin an ni a, an hla hit ‘Y.M.C.A.’ hi US President Donald Trump-ah a campaign rally vel atan a hman thin bakah he hla a lampui thin dante avangin a rawn lar thar leh ta hle a ni.
US President Trump chuan Truth Social-ah Victor Willis a ui thu post-in, “Pa ropui leh hlim tei tak, an group hla YMCA ka rally-ah te ka hman thin avanga lawm ve thin tak a ni. An tlangzarh atanga kum 30 hnuah a rawn ‘hit’ tar leh a. Zaithiam leh group tam takin Rally Attendance Record kan siam thin avangin rawn tel an chak thin. Mahse, Victor leh an group hi a tir atanga kan tana awm an ni tlat! Nuam an ti a, keini pawhin an hla mi chawkphur thei tak mai hi kan ngaina a ni.
“Vawiin ang hian YMCA hla an zaitir apiangin Victor hi kan hrechhuak ziah dawn a, July Fourth Birthday (American Independence Day) kar tluan nen. A chhungte leh an group ka tawrhpui takzet a, Victor Willis hi kan ngai dawn takzet a ni, Pathianin awmpui rawh se!” a ti.
Victor Willis thih chhan tak hi he thu buatsaih lai hi chuan an la puang lo a, natna thawk chak tak avangin reilote chhungin a liam ta thut mai niin an tarlang. An group social media-a a thih thu an puannaah chuan, “Hrehawm ti tak chunginVillage People lead singer VICTOR WILLIS thi thu kan puan a ngai ta si. Victor hi Thawhlehni, June ni 30, 2026 khan natna thawk chak tak avangin mual a liam ta thut a ni. Privacy kan zah sak dawn nia,” tiin an tarlang a, Willis-a nupui, Karen-Huff Willis pawhin hetiang chiah hian a pasal FB page-ah a post ve bawk.
Victor Willis hi July ni 1, 1951 khan Dallas, Texas-ah a piang a, San Francisco-ah seilianin, a pa, Baptist pastor enkawl kohran biak inah Pathian hla te a sa thin a, chumi hnuah soul music lamah kalin, Negro Ensemble Company a zawn a, 1976 khan Broadway production The Wiz-ah a inlan.
1977-ah French music producer Jacques Morali le Henri Belolo te nen intawngin, anni hian an group Ritchie Family album a background singer tur an zawng a, mahse, Willis chu background vocal mai ni loin, an la pali-a lead singer-ah an hmang ta hlauh a, “San Francisco (You’ve Got Me),” “In Hollywood (Everyone’s a Star),” “Fire Island” leh “Village People” te an record a. He album hi Billboard 200 chart-ah 1977 khan No.54 a kai a ni.
Heta tang hian Willis, Felipe Rose (American Indian), Alex Briley (soldier), Lee Mouton (biker), Mark Mussler (construction worker), David Forrest (cowboy) te group Village People chu a rawn ding ta a ni. A hnuah band lineup inthlakin Glenn Hughes (leather daddy), David Hodo (construction worker) leh Randy Jones (cowboy) an tel ve leh thung.
1978-ah an hla ‘Macho Man’ chu Billboard Hot 100-ah No.25 a kai a, chumi hnuah an album pathumna ‘Cruisin’ an tlangzarh leh ta bawk. He album-a hla ‘Y.M.C.A.’ hi an larpui ber a ni ta a ni. He hla hi 1979 khan Billboard Hot 100 chart-ah No.2 a kai a, an group hlaa lar ber a ni ta a, Grammy Hall of Fame-ah pawh a hla hi lak luh niin, party-na leh infiamna hmun hrang hrangah an zaitir ta chuah chuah mai a, tunah khawvela pa thiltithei ber Donald Trump-a hla chuam a ni bawk nen, he hla hi a lar thar leh ta hle a, Trump-a term hnihna an lakluh lawmnaah pawh Village People hian ‘Y.M.C.A.’ hi an perform nghe nghe a ni.