Vladimir Putin-a’n tum tihhlawhtlin tum

Russian President Vladimir Putin chuan Ukraine nena inremna chu ‘kan tum kan hlen hnuah chauh’ a awm ang a ti.
Heng thute hi February 2022 a Ukraine a run hnua news conference pangngai a neih leh hmasak bera journalist te zawhna a chhanna a ni.
Ukraine a ‘special military operation’ kalpuiah frontline ah danglamna siam niin dinhmun a tha tial tial a ti bawk a.
Putin-a ‘direct line’ programme hi television tihchhuah niin darkar li chuang lai awh a ni a. President Putin chuan Russians te chu “Sovereignty tel lovin kan ram a awm thei lo,” tiin a hrilh a.
Russia economy chu a that tawk thu sawiin mahse sawi thui lovin rang takin Ukraine indonaah a luhpui nghal thung.

‘Ukraine-ah Russian fighter 617,000 awm’
Putin chuan, “Kan tum kan hlen hnuah Ukraine nena inremnaa awm ang” a ti a, “Kan tum kan la thlak lo” a ti bawk a. “denazification, demilitarisation leh neutral status” tiin a sawi a. Heng thil pathumte hi indona kalpui tirh atanga a sawi tawh te a ni.
Russia chuan Ukraine-ah sipai indonaah 617,000 a tir lut tiin a sawi bawk a. Nikum khan sipaia tang turin mi 300,000 kohkir an ni a ti bawk a, 486,000 ten voluntary-in sipaia tan duhin an hming an pe lut a ti bawk.
“Ralthuam nena ram venghim tura inpe mihring kan tlachham lo” tiin a sawi a. “Kumin kum tawpah chuan maktaduai chanve vel kan inhmu tawh ang a, mobilisation mamawhna kan nei lo” a ti bawk.
Russia sipai nunna chan zat a sawi duh lo thung a, mahse, amah hnaih tak tak te fate chu private military company tana beiin amah hnaih tak tak te nunna chan an awm thu a sawi thung.
Hetih lai hian US intelligence report chuan Ukraine indona kalpui mekah Russia chuan sipai 315,000 a hloh tawh tiin a sawi thung.
Hmun thenkhata Ukraine sipai tena ram an lak chungchangah Putin chuan Russian sipaite chuan ‘kan mite him nan’ hnungtawlh zawk an thlang mai a ni a ti a. Kyiv thil tum ber chu Khawthlang ram hnena military funding tam zawk mamawh a nih lantir a ni mai a ti a.
“Eng nge an tih ka hrethiam lo, an mi leh sate thi turin an nawr lut a ni ringawt a. A chhan chu politics thil niin Ukrainian leader te hian foreign aid an ngen vang a ni,” tiin Putin chuan a sawi a.
Ukraine thlawpna chu a tlakhniam zel thu sawi bawkin, “Ukraine hian tharchhuah a nei mang lo” a ti a, “Engkim mai freebie angin a la lut a. Heng freebie te hian tawp chin a nei dawn. A landanah a tlahniam tial tial,” tiin a sawi bawk.
Russian leader-in press conference a neih lai hian NATO headquarter Brussels-ah Nato Secretary General Jens Stoltenberg chuan news conference nei ve thovin, “Putin-a’n Ukraine a hneh a nih chuan a huangtauna hi a tawp dawn hauh lo,” tiin a sawi thung.
Ukraine President Volodymyr Zelensky pawhin EU summit a leader te chu Putin chuan Ukraine chungchanga thutlukna an siam hleih theih loh chu remchangah a hmang dawn a ti bawk a.
“Ukraine chungchanga negativity lam Moscow-in Europe atanga a dawng a nih chuan Putin chuan mimal mai bakah Europe tinte beih nan a hmang ang” tiin Zelensky chuan a sawi.
Hetih lai hian Putin chuan Russian forces te chuan Ukraine frontline ah dinhmun tha zawk an chang tiin a sawi a. Kan sipai ten hma an sawn zel zawk tiin a sawi.
Frontline-ah tun hnaiah a khawi lam ve veah pawh hmasawnna a awm lo hle a ngaih a ni thung a. Russia erawhin khawchhak lam Donetsk region-a Mariinka leh Avdiivka khua erawh lak tumin a bei thung. Putin chuan khawthlang ram ten an hrek chungin Ukraine runnaah Russia chuan hma lam a pan zel ang, a ti bawk.

‘Russia-a American man te’
Putin chuan United States leh EU chungchang pawh a sawi a. US chu ram pawimawh a ni tia sawiin mahse imperialism kalpuitu a ti a. US chu ‘midang leh ram dang zah’ turin a ngen a, chu chu a thlen chuan Russia chuan inzawmna siam that a inpeih a ti bawk.
New York Times correspondent Valerie Hopkins chuan Russian leader chu eng hunah nge American khua leh tui journalist tha tak Wall Street Journal correspondent Evan Gershkovich leh marine hlui Paul Whelan chhuah zalen an nih ang tih a zawt a.
Heng mi pahnih te hi dik lo taka hren niin gershkovich hi Yekaterinburg khawpuia news reporting a tih lai mekin enthlatu tia man a ni.
“Mi tâng inthlen tawn theih a ni a, inremna siam kan duh a, kan inremna chu ram pahnih ten kan zah tur a ni bawk,” tiin Putin chuan a sawi a, lung in tang mek te chu court thuhnuaia awm a ti bawk a.
“Inbiakna neih mek a ni a, a harsa hle a, kimchangin ka sawi thei lo. Kan hriathiam tlan dan angin kan kalin ka hria a, inremna kan neih theih pawh ka beisei,” tiin a sawi bawk.