Vohbik enkawlna school tan bus

Vohbik enkawlna school tan bus
Chief minister Lalduhoma chuan a bial Serchhipa Shalom Spastic Society enkawl vohbik school, Shalom Special School chu school bus thar, mi 21 chuan theihna seat awm mini bus (Force Traveller) a pe.
Sawrkarin vohbikte zirna lamah ngaihtuahna a seng zel tih chief minister hian a sawi a. An tana insengsoa theihtawp chhuah thin mi tam tak an awm tih a sawiin, Shalom Special School pawhin a school building thlenga saksaktu a nei ropui a tih thu a sawi.
He bus thar hi sawrkar sum engmah seng loin, rualbanlote hmangaihtu, an mamawh zia hria, a thianten an thawhkhawm atanga an lei a ni tih Lalduhoma hian a sawi a. A ni chuan a hming a tum ve ringawt tih a sawi.
He school hi kum 2005-a mi thahnemngaite din a ni a, an school building hi Assam Rifles-in kum 2011 khan an saksak a, eiin tur thilte an pe zui reng thin. Zirtirtu pathumin hlawh nei loin zirtir hna an thawk a, zirlai 32 an awm a ni.