Vohbik enkawltuten khaw dang hawi hma lo turin ngen
Vohbik enkawltu pawlte chuan Persons with Disabilities commissioner thar lak tum chungchangah sawrkar chu khaw dang hawi hma lutuk lo turin an ngen.
Vohbikte enkawltu pawl hrang hrang pasarih intelkhawmna – Federation of Mizoram Disabled Organization (FMDO) thuchhuak chuan, Mizoram Social Welfare & Tribal Affairs principal secretary chuan 2023 September 19 khan Persons with Disabilities (PwD) commissioner lak tur advertisement a tichhuak a. Tuna commissioner hi 2024 February-a a term tawp tur chauh a ni tih a sawi.
PwD commissioner lak turah hian sawrkar chuan The Mizoram Commissioner for Persons with Disabilities (Recruitment and Conditions of Service) Rules 2016-in a phut ang qualification nei chauh la se a duh thu te; he hna hi hna dang ang ni lo, rualbanlote dinhmun chawikan leh humhalh hna thawktu a nih vangin helama tuimi, rualbanlo tana thahnemngai taka thawk thei tur mi chauh lak ngei nise an tih thu te; tuna commissioner thawk lai hi rualbanlote hmangaihtu leh a hna a tui, thahnemngai taka rualbanlote tana thawktu leh thiamna leh experience pawh RR-in a phut zawng zawng nei vek, rualbanlote enkawlnaa kum 30 chuang thawk tawh leh hmachhawp tam tak a neihte tipuitling se an duh thu an sawi a ni.
FMDO sawi danin:
4PwD commisioner lak tumnaah hian advertisement-ah he danin a phut ang kimchang taka tarlan a ni loa, recruitment rules-in a phut – Rule 3 (A) a educational qualification bakah Rule 3 (B) a experience neih ngai a tarlan – central /state sawrkar, public sector undertaking zingah kum 10 tal thawk tawh leh a tlem berah tunhnai kum thum chhungin rualbanlo chawikanna hmuna thawk a ni ngei tur a ni, tih chu ngaipawimawh tur leh, he danin a phut ang tlinte chauh la turin sawrkar an ngen.
4PwD commisioner ni lai hi February 2024-a a term tawp tur chauh niin, a hmachhawp tam tak kallai chhunzawm ngei se an duh a. (Recruitment and conditions of Service) Rules 2016, Rule 7(2) in a sawi angin, he hna hi term hnih chhung chelh thei a ni. Dan ang taka midang qualify leh rualbanlo tan a tha zawk leh experience nei tha zawk an awm a nih loh chuan mithar duh vang hrim hrima thlaksak ngawt lo turin sawrkar an ngen.