Vohbik hlangin an vil bik polling station siam dawn

Kumina Lok Sabha inthlanah Aizawl district-ah chuan vohbik (Persons with Disability) hlangin an vil bik Assembly bial tinah polling station pakhat siam a ni dawn tih Aizawl district election officer, bawrhsap Nazuk Kumar chuan a sawi.
Aizawl DEO sawi danin, MP inthlan atan hian Aizawl distirct-ah vote nei mi 290058 an awm a, heng zinga 134843 chu mipa niin 153480 chu hmeichhia an ni. Service voter 1735 an awm bawk. Aizawl West-I MLA bial chu voter tamna ber niin, vote nei 30094 an awm a, Tuivawl MLA bial chu vote nei tlemna ber niin 17899 an awm.
An district-a voter zawng zawng atangin mipa za zelah hmeichhia 1138 an awm a, thalai kum 18-19 inkar vote nei 10131, kum 85 chunglam vote nei 1493, vohbik (PwD) 778 an awm.
Aizawl district-ah polling station 321 a awm a, hmeichhe hlangin inthlan an buapuina polling station chu MLA bial tinah pali zelin, a vaiin 48 dah a ni. Hei bakah hian vohbikte pualin polling station pakhat zel siam tum a ni a. PwD disability certificate nei leh kum 85 chin chunglam tan vote in lam leh polling station-a vote thlak theih dan tur ruahman a ni.
Inthlan thianghlim leh felfai a awm theih nana hma la tur team hrang hrang dina hman tangkai mek an ni a. MP inthlana Aizawl district-a hman tur ballot unit 514, control unit 523 leh VVPAT 541 ruahman a ni tih DEO hian a sawi bawk.
MP inthlanpuiah thianghlim leh felfai, mitin huap a nih theih nan mipui tawiawmna ngenin, dan bawhchhe lo tur leh vote thlak theuh turin a ngen a ni.