Vote chhiar hnuah campaign \an!

Lai Autonomous District Council (LADC) inthlan an zo a, mi 25 an tling fel tawh. Mahse sorkar tur a la chiang lo a, political party te’n campaign an tan leh chiah!
LADC inthlan, Thawhlehnia vote chhiarah party mala sorkar thei an awm lo a, sorkar intawm din a ngai. Chumi atan chuan party-te hian theihtawp an chhuah nghal a ni.
Political party hruaitute’n sorkar intawm siam a ngai ang tih an ring sa a, vote chhiar ni-ah pawh rang taka che nghal thei turin Aizawl atangin Lawngtlaiah party hruaitute an awm sa. Vote chhiar zawhah political party-te hi an thukhawm sap sap nghal.
ZPM an thawk rip a, an president Lalliansawta hovin minister Lalrinpuii te, adviser to chief minister pahnih Lalmuanpuia Punte leh TBC Lalvenchhunga te’n Lawngtlai-ah an awm chilh. Thawhlehni tlaiah khan Lawngtlaiah ZPM hi an thukhawm a, an kal zel dan tur an ngaihtuah tih thu dawn a ni.
MNF lamah leader of opposition Lalchhandama Ralte leh Thorang bialtu R Rohmingliana te’n an thut chilh a, Thawhlehni tlai lamah khan MNF atanga MDC tling tharte nen an thukhawm.
Congress party chu an vice president C Ngunlianchunga a awm sa a, ani hi MDC atana tling thar niin, a hovin tling tharte an thukhawm a ni.
Congress vice president hian an awm dan tur chu hunin a hril ang tiin a sawi a, party hotute’n an ngaihtuah zel tur thu a sawi.
Party dang an dawr hmasak loh tur thu a sawi a, “Tu mah ka dawr hmasa lo ang. Min dawr duh an awm a nih chuan kan lo bia ang chu,” a ti.
Sorkarah an tel ngei ang em tih thu-ah chutianga rel a awm loh thu a sawi a, “Engmah thu dah sa a awm lo a, party-in a ngaihtuah zel ang a, hunin a hril ang,” a ti.