Election Commission of India chuan, State pangate inthlan result puan ni/vote chhiar ni atana December ni 3, 2023 Pathianni a lo ruat tawh chu, Mizoram mipui ngenna ngai pawimawhin a rawn sawn ta a, vote chhiar ni atan Thawhtanni, December ni 4, 2023 chu ruat thar a ni.
Hetianga mipui ngenna ECI-in a tihlawhtling ta hi a lawmawm hle a, chutih rual erawh chuan, ECI hi a ngawih rei avangin tha leh zung, hun, sum leh pai bakah rilru buaina nasa tak a thleng hman erawh hi chu a pawi hle a ni.
October ni 9-a state pangate inthlan hun leh vote chhiar hun ECI-in a puan hnu lawkah, kohhran, pawl leh political party hrang hrang ten vote chhiar ni atana Pathianni December ni 3 ruat a ni chu dodal nghalin October ni 10-ah ECI hnenah a hun sawn tura ngenna thehluh nghal a ni a.
Hemi hnu hian November ni 3-ah, vote chhiar ni sawn tura ngenna ECI hnenah thehluh leh a ni a, hmanni lawkah NGOCC aiawh ten ECI hmunpuiah kalchilhin vote chhiar ni sawn turin an ngen leh a. ECI hotute hian lamkalte hi an lo dawngsawng ve ngei a, member kima an ngaihtuah tur thute pawh an lo hrilh nghe nghe a. Mahse, an ngawih zui tak reng avangin niminah NGOCC huaihawtin punkhawm huaihawt a ni a, ECI thiltih dan tha lo an tih thu leh pawi an tih thu te, vote chhiar ni sawn tura an ngen nawn leh thu te resolution an siam nghal bawk a.
Nimina punkhawmnaah hian, NGOCC hruaitu pakhat chuan, Mizoram CEO laka an lungawiloh thu a chham chhuak hial a. Nimina punkhawmna huaihawt a nih lai pawhin ECI lam chuan pip e pup e an la rawn ti lo a. Naktuk mai hi vote chhiar ni ruatsa kha a nih tawh avangin, a hma zawng pawha engmah beiseiawma tawngchhuak duh lo an ni zo tawh a, vote chhiar ni sawn beiseina a sang lo hle hman a ni.
Tunah, vote chhiar hun nikhat vel chauh a karah a tla tawh tihin hun sawn a nih thu nizan dar 8 vel khan an rawn puang ta a, hei hi nimin lama punkhawm leh kohhran mite tawngtai rah a tih theih ang a. Nizana social media-a thu inthawn tawn tam ber a ni awm e.
Mi thenkhat, ‘exam leh eng eng emaw Chawlhnia neih thin pawh kan en liam tho alawm’ ti zawnga ngaihdan nei an awm thin hi, ngaihtuah chian loh vang a nih a rinawm. Chawlhnia Exam leh State General Election vote chhiar hi chu a nghawng leh a kaihhnawih a inthlau a, tehkhin chi pawh a ni lo hial awm e: Chawlhnia exam neih thin hi a pawi lo e tihna ni chuang lovin.
Vote chhiar hun sawn…
Get real time updates directly on you device, subscribe now.
Prev Post