Naktuk, June 4-a 1-Mizoram (ST) Parliamentary constituency atana Lok Sabha inthlanpui vote chhiar tura inbuatsaihna chu tluang taka kalpui niin, vote chhiar turin Mizoram a inpeih tawh.Vote chhiarna hmun tur counting hall-te chu Election Commission of India thupek angin vote chhiar hma ni thumah buatsaih fel vek tura tih a ni angin, May 31 khan Mizoramah pawh district hrang hrangah peihfel vek tawh a ni.
Vote chhiar tura mawhphurhna hrang hrang neiten training an zo fel a. Vote chhiarnaah hian returning officer, assistant returning officer, counting supervisor, counting assistant, micro-observer leh hna pawimawh dang hrang hrang thawktu mi 2000 vel an awm dawn a. Security mi leh sa ten counting centre tinah thuah thumin venhim hna an thawk dawn a ni.
Election hotute sawi danin, EVM (Control Unit) a vote tla chhiar zawh vek hnu in, Assembly segment tina polling station 5-a VVPAT-a vote tla (paper slip) chu EVM (Control Unit) a vote tla nen a inmil em tih finfiah zel tur a ni a. VVPAT chhiarturte hi pawhfuh hmanga thlan tur a ni. Hetianga VVPAT-a vote tla chhiar (mandatory verification) hi inthlanpui hmasaah khan Assembly segment tina VVPAT pakhat zelah neih a ni a, kumin inthlanpuiah hian Assembly segment tinah VVPAT 5 zel chhiar tel tawh tur a nih dawn avang leh, heng VVPAT hi a ruala chhiar loa a indawta chhiar tur a nih avangin vote chhiar hun chhung pawh a rei phah hret thei dawn a ni.
Vote chhiar hi rang leh felfai taka mipui hnena puanzar a nih theih nan district hrang hranga Counting Centre tinah Media Centre dah zel a ni a. Vote chhiar result rang leh felfai zawka phuahkhawm a, mipui hriat tura puanzar zung zung a nih theih nan CEO office Mizoram chuan ruahmanna a siam a ni.
-- Advertisement --
8 Zing dar 8.00 atanga vote chhiar tan tur niin, Aizawlah chuan postal ballot chhiara bul tan a ni dawn. Postal ballot chhiar tan a nih atanga minute 30 hnuah EVM (Control Unit) a vote tlate chhiar zui a ni ang. Vote chhiar lai hi candidate, election agent leh counting agent-ten a hmunah an en thei ang.
8 Mizoram pumah Counting Centre 13 ruahman a ni a. Aizawl district-ah pathum, district dang zawngah pakhat theuh a awm ang. Counting Hall 40 a awm dawn a, heng Hall-ah hian counting table 379 awmin vote chhiarna dawhkan tinah counting supervisor pakhat, counting assistant pakhat leh micro- observer pakhat zel an awm dawn. vote chhiarna hmun hi ECI ruat observer-ten an vil dawn a ni.
8 Counting table awm zat leh vote chhiar tur counting station awm zat hian chhiar hun (round) hi a hril dawn a. Round 5-a chhiar zawh tur Assembly segment 5 a awm a, round 4-a chhiar zawh tur awmna Assembly segment 15, round 3 awmna Assembly segment 18 awmin, round 2-a chhiar zawh tur Assembly segment 2 a awm.
8 Venhimna chhawng thuma kalpui tum a ni a. A hmasa berah counting centre atanga metre 100-ah danna siam a ni anga, a pahnihnaah counting centre luhna state armed police force-ten an veng anga, a pathumnaah counting hall luhna central APF ten an veng dawn a ni.
8 Counting hall tinah ARO an awm vek dawn a, observer an puih bakah vote chhiar an thlithlai ang. Counting centre tinah fire tender leh medical duty team an awm ang.
8 District dang atangin asst returning officer-ten vote chhiar zat an thehlut ang a, result chu Aizawl DC office atangin returning officer-in a puang dawn a ni.