‘Vote Jihad’ nge ‘Ram Rajya’ duhthlang turin PM Modi-an mipuite ngen

Prime Minister Narendra Modi chuan May 7 khan rally a neihnaah India ram chuan history-ah hun pawimawh tawngin mipuite chuan ‘vote jihad’ nge Ram Rajya zawk an duh tih an thlang dawn tiin a sawi.
Madhya Pradesh a Khargone district a rally a neihnaah Modi chuan Opposition Congress chu na taka beiin a lakah vote jihad kalpui tumah a puh a. “India hian kawng pengthuam a tawng mek a, vote jihad nge Ram Rajya zawk induh intichiang dawn a ni,” tiin a sawi.
“INDIA alliance partners te hian mipui nawlpui te engahmah an ngai lo, an dynasty humhim nan inthlan an hmachhawn zawk a ni,” tiin PM Modi chuan Opposition bloc te chu a bei a. “Opposition INDIA alliance partners te tan chuan an dynasty chu ram ai pawha pawimawhah dahin chumi humhim tur chuan engpawh an huam ang,” tiin a sawi.
“Pakistan-a terrorists te chuan India lakah jihad kalpuiah an vau a ni. Hetah pawh Congress te chuan Modi lakah vote jihad an kalpui thu an puang a, chumi awmzia chu sakhua pakhat betute chu Modi vote lo tura inlungrual turin an ti a ni. Chutiang vel chu Congress te kun hniam dan chu a ni,” tiin a sawi bawk.
Prime Minister chuan Congress te chuan thiltum tha lo tak neiin an chet dan chu a hlauhawm a ti bawk a. “Chumi hrethiam tur chuan Congress hruaitu leh workers te kum 20-25 vel lo thawk tawh te chu an thu leh hla inngaihthlak a ngai a, chung mite chuan an chhuahsan mek a ni,” a ti bawk a.
“Hmeichhe pakhat chuan Ram temple a tlawh avangin nasa taka diriam a tawk a Congress a chhuahsan phah a ni,” tiin Modi chuan a sawi bawk a. Congress party chhuahsan tu dang pakhat chuan ‘Muslim League leh Maoists ten an thunun tawh a ti bawk’ tiin a sawi.
“Hruaitu dang Congress chhuahsan tu chuan inphiarrukna thuktak party chhugnah a awm a, shehzade (prince) of Congress (Rahul Gandhi sawina) chuan a pa in Shah Bano case a Supreme Court thutlukna hnawl a tum ang tho khan Ram Temple a Supreme Court thutlukna chu hnawl a tum a ni a ti,” tiin Modi chuan a sawi bawk.
Modi chuan Congress leh INDIA alliance te chuan an rinna leh ram tana tha pawh an ngaihtuah hauh lo a ti bawk a. “Congress party chhungah phei chuan anti-national statement insiamsiakna a thleng mek a ni,” a ti bawk.
Prime Minister chuan Congress te chuan ‘Pakistan an hmangaih’ ti bawkin, “Congress CM hlui pakhat chuan kan Army te chuan firfiak te an bei a, Pakistan chuan inhnamhnawihna a nei lo a ti,” tiin a sawi bawk a.
“Congress hruaitu lawk te zahtheihlohzia hi en teh u, Mumbai terror attack-ah khan Pakistan-in inrawlhna a nei lo te an ti a nia” tiin Modi chuan a sawi bawk a.
“Congress prince chu hetiang ang hian eng vangin nge i thawhpui te hian tawngkam an neih tih ka zawt a ni. Enga ti nge Pakistan inhmangaih em em a, kan Army te inhuat em em?” tiin zawhna a siam bawk a.
Opposotion te chuan amah an beihna lamah tihtheih pawh an nei tawh lo va, an agenda zawng zawng ka hailang vek tawh a ti bawk a. “In vote avangin India chu khawvel economy lian ber pangana a ni tawh a, Article 370 a thiat tawh bawk a, tribal hmeichhia he ram President ah a hlangkai bawk a. In vote avangin India mi vaibelchhe 25 te rethei bakberh ata khaichhuahin an awm phah tawh a ni” tiin Modi chuan a sawi bawk a.
“In vote chuan Ayodhya-ah kum 500 hnuah Lord Ram temple a dintir a” tia sawi bawkin, “Mipui te thutlukna avangin ramin hma a sawn zel a ni,” tiin Modi chuan a sawi a ni.