Vote thlak ve thei loa insiam hi kan inthlan history-a vawikhatna – Dr R Lalthangliana

April 19-a Mizorama Lok Sabha MP inthlan neih takah Mizoram Armed Police 1047 vote thlak thei loa siam an ni chu pawi an ti a, Mizoram inthlan history-a a thlen vawikhatna a ni tih MNF senior vice president Dr R Lalthangliana chuan a sawi a. State sawrkar inthlahdah vang a ni tiin, police-te laka ngaihdam dil turin a phut.
MNF senior vice president sawi danin, sawrkar laipui Ministry of Home Affairs (MHA) atanga ngenna Mizoram sawrkarin a dawn bawhzuiin, sawrkar thuneitute chuan vote an thlak dan tur engmah ngaihtuah fel sak hmasa loin Mizoram Armed Police company 15 – sipai 1047 chu state pathum – Bihar, Uttar Pradesh leh Madhya Pradesh-a duty turin a tir a. Duty tura a tirh liam hma hian postal ballot hmanga vote an thlak theih dan tur ruahmanna siam theih a ni dawn tih a chiang reng chungin, vote thlak thei lo tura ruahmanna a siam chu an dikna chanvo rahbeh sakna a ni tih a sawi.
Bihar leh UP ah hian April 1 leh MP ah April 8-ah an duty-na tura in report turin MHA hian rawtna a siam a. Hemi ang hian Bihar-a kal turte March 29, UP-a kal turte March 28-ah, MP-a kal turte April 3-ah rel ticket laksak an ni a. Mizorama MP inthlanah March 30 kha candidate-te tana inhnuhdawh theih ni hnuhnung ber a nih chauh avangin, postal ballot pawh chhutfel a nih hma in, sipaite hi state pawna duty tura tirh chhuah rum rum an ni tihna a ni tih a sawi a ni.
Lok Sabha inthlan atan hian rampumah thawh 7-a vote thlak tura ruahman niin, thawh khatna April 19, thawh hnihna April 26, thawh thumna May 7, thawh lina May 13, thawh ngana May 20, thawh rukna May 25 leh thawh sarihna June 1 a ni a. Mizoram sawrkarin ruahmanna felfai nei nise, MHA-in Mizoram Police-te inthlan duty tura ruahmanna a rawn siam ang anga vote thlak hmaa intirliam mai loin, police-te hi inthlanpui vote thlak thawh thumna leh a hnu lama duty tur pawhin ruahmanna a siam theih em em dawn tih a chiang tih Dr R Lalthangliana hian a sawi.
“Hetiang ruahmanna siam ngam lo/ siam nachang hre lo sawrkar kan hrawn avanga police 1047-in vote an thlak theih loh phah hi an dikna chanvo rahbeh/ palzut sakna, engti zawng maha sawifel ngaihna awm lo, thil dik lo leh Mizoram sawrkar tana zahthlak tawpkhawk a ni,” a ti.
Mizoram Police hotuten an nauten vote an thlak theih loh mai hlauthawnga an theih ang anga hma an lak laiin, state sawrkar hotu lam atangin nawrpuina thawm hriat tur pakhatmah a awm lo tih a sawi a. April 17 khan IGP Mizoram (state police nodal officer) chuan chief electoral officer Mizoram hnenah vote an thlak ve theihna tura ruahmanna siamsak turin lehkha a thawn a, CEO hian ECI hotute hnenah thawn chhawngin, ECI atanga lehkhaah chuan heng police-ten vote an thlak ve theihna tur kawng a inhawn tawh loh thu an rawn hrilh tih a sawi a ni.
“Hei vang hian Mizoram Armed Police 1047 chuan tun MP inthlanah hian danin a phalsak leh a phut anga an aiawhtu tur MP thlanah vote an thlak ve thei dawn ta lo a. Mizoram sawrkar hian duty tura a tirhliam hma in postal ballot hmanga vote an thlak theihna turin Home ministry lam dawr theihna hun zau tak a nei chung a, vote thlak thei lo tura ruahmanna a siam kher kher hi Mizoram inthlan history-a thil la thleng ngai lo a nih bakah thleng nawn tawh lo se kan ti,” MNF hruaitu hian a ti.