VUC leh Kalphungthar chu nihnaah ni lovin thil tihah a awm tur a ni

K. Hmingthankaia

September ni 8, 2026-a Dawrpui Multipurpose hall-a ZPM party executive meeting-in party President leh Chief Minister nih kawp theihna dan an lo siam leh tak chu social media lamah mi thenkhatin, ZPM-in Kalphungthar an tih chu a lo tawp ta ang hial maia ngaiin sawi nuam an lo ti ta viau mai a. Party President leh Chief Minister nih kawp theih loh tih chauh hi ZPM-in kalphungthar an tih chu a nih hmel si lohva. Party President leh CM nih kawp leh nih kawp loh lampang pawh hi mipui enghelh ber leh mipuiin kalphungthar an lo beisei ber pawh chu a nih hmel chiah lem lo bawk a ni. Tin, he nihna chelh kawp hi a mihring azir leh an party kal dan, an party sukthlek leh an party khawsak danin a zir ngang lo te a nih ngawt loh chuan ram leh mipui tana thil pawi tak, ram leh mipui hmasawnna daltu lian tak, mipui tana phurit tak pawh chu a nih hmel chiah lem loh bawk a ni. Party chhunglam inrelbawlna lam mah kha a nih hmel zawk bawk si a.
Nimahsela, ZPM party chuan thil fel tak leh dik taka tih theih nan chuan, sawrkar hmasate tih dan ang ni lo, tih dan dang, kalphung tharin, party President leh Chief Minister chu nih kawp loh ni rawh se, an lo ti ta kha niawm tak a ni.
Amaherawhchu, hun engemaw chen chutianga an han kal chhin tak hnu chuan, an party tan tha lo leh zawk dawn niin an lo hre leh ta a ni ngei ang chu, hei, tun dinhmunah chuan nih kawp theih ni leh zawk rawh se, an lo ti leh ta a nih hi. Thil tha lo tur ven nan leh thil tha zawk tur atan chuan thil tih dan thlak ngam hi mi fing leh mi huaisente tih dan tur chu a ni reng a ni. Chuvangin, ram leh mipui tana tha zawk tur a nih dawn phawt chuan kalphung chu thlak ngam zel tur a ni mai.
Eng vanga hetianga ti leh ta nge an nih tih phei hi chu keini ang chuan kan lo hre ve vek thei lo tawp ang le. Chhung lampanga engemaw chhan tha tak awm avang leh, an party chhungkaw tana tha zawk tur thil avanga hetia ti leh ta hi an ni ngei ang tih erawh hi chu lo ring ve phawt mai ila a tha mai awm e. Keini aia an party tana ngaihtuahna seng nasa zawktute an awm ngei ang tih pawh hi lo ring ve phawt mai bawk ila.
Hnam tin leh khaw tinahte, pawl leh political party zingahte hian hotu chan chang tur bik deuh, mi hip leh mi hui khawm thiam bik deuh, mi hneh theihna bik riau nei mi danglam bik deuh hi chu an lo awm deuh zel a. Chutiang mi chu Mizo zingah pawh an lo awm tawh thin a, political party zingah pawh an lo awm tawh thin. Chutiang mite chu party president leh sawrkara a hotu bera awmtir mai kha a fin thlakin a fuh ber zel zawk bawk reng a ni. Tuna ZPM party-ah pawh hian chutiang mi chu chiang takin Pu Lalduhawma hi a ni tih hai theih a ni lo.
ZPM party phei hi chu party naupang tak leh mi chi hrang hrang awm khawm, ruling party nihna han chelh ve ta phut mai site kha an ni si a, hruaitu tha fekfawk tak mamawh tur tak kha chu an ni ngei ang tih kha chu a rin theih mai a ni. Hmanni lawk atanga chutiang mihring inpawlhsawp, mahse, ruling party ni ve bawk si karah chuan engemaw neuh neuh te pawh chu a lo awm ve ngei ang tih chu hriat sa a ni. A chhan chu, he khawvel mihring ve tho kha an ni miau si a. Chumi avang tak chuan party hruaitu khauh deuh leh ti fekfawk, mi convince thei tak tur, mahse, experience tam tak leh rilru zau tak nei si kha chu an mamawh bik hle ngei ang le. Chumi tur chuan tun dinhmun atan chuan Pu Lalduhawma lo chu midang an la awm hrih lo chu a nih hi. An rorel hi tun dinhmun atan chuan a la fuh hrih hle a ni. Tin, inthlan leh hun tur thlir ran chunga ti an ni ngei bawk ang tih te pawh kha lo rinsak thiam ve bawk ta ila.
A thuhrimah mipuite hian party president leh CM nih kawp loh tih chauh hi em ni kalphungthar kan lo beisei leh kalphungthar kan lo hmuh tak chu ni le? Chutianga an lo nih kawp leh nih kawp loh lam pawh chu kan lo ngaihtuah tawh mang loh lai hian, an thil tih leh an hnathawh leh kawng hrang hrangin, mihring mipui rilru put hmang thleng hian tunah chuan kalphungthar thami chu kan hmu mawlh mawlh lo em ni le?
Chief Minister leh party president chu lo ni kawp lo sawmsarih pawh chu ni ta se, department chanpual te pawh chu lo nei lo pawh chu ni ta se la, an kal dan, an thil tih leh an hna thawh danahte, an awm dan leh an khawsak danahte sawrkar hmasate aia danglamna awm chuang lo a nih si chuan kalphungthar chu a ni thei dawn chuang emaw ni le?
Chief Minister leh party President nih kawp avanga party a lo that phah zawka, party a lo inlungrual lehzual phaha, party-in hma a sawn lehzual phah theihna tur a nih dawn phawt a lo liam enge maw a pawina tur chu awm ang le? Sawi tawh angin ZPM party chu la chhangchhe ve deuh tak kha a la nih hrih avang hian, ‘Kalphungthar’ kalpui thei tur sawrkar pawh kha a awm lo mai anga tih hlauhthawnawm khawp deuhthaw te khan party hruaitu lamah te khan an lo buai ru ve deuh nek nek tawh a ni tih te kha chu kan lo ring thiam ve mai a nih kha.
ZPM sawrkar hi khawvel political party sawrkar ve tho kha an ni a. Khawvel thil tak leh mihring thil tak pawha thil tam tak chu an tih ve pawh kha a ngai a, an party tana tha tur phei kha chu an ngaihpawimawh em em ve tur kha a ni tlat a ni, tih te kha lo hriatthiampui ve zawk ta ila. Vanrama kan la awm dan tur ang em em kha chuan lo la beisei bik lo ang u. Chutih rualin, tunhmaa sawrkar tawhte ai thlawt chuan an langtlang zawkin mipui nen pawh kan inhne hnai tawh zawk a, kalphung chu a dang deuh tawh zawk chu a ni lo’m ni? |ha famkim thei lo rau rauah chuan mipui hian kan la duh deuh ber chu a ni mai lo’m ni?
He leiah hian eng sawrkar dang tehchiam vak hi nge maw han beisei leh chuan tur kan neih theih teh vak ang le? Keimah leh kan chhungkaw duh dan ang thlap thlapa awm tur sawrkar hi chu he leia kan dam chhung hian kan hmu zo thei dawn chuang lo tih te pawh hi hria ila. Tin, khawvel thil chi hrang hrang leh mi chi hrang hrang kara roreltute pawh hian anmahni duh dan ang thlap thlapin engkim hi an awmtir thei vek bik lo tihte pawh hi lo hre nawn leh ta bawk ila. Chuvangin, tuna ZPM sawrkarin theih tawpa mipui lam hawi deuh ngar ngara a kal anga lang leh, an theih tawk leh an phak tawk anga ram leh mipui tana an theih tawp chhuah ni anga an lang hi chu a tha thawkhat hrih viau mai a ni lo’m ni? Keia hmuh dan tak phei hi chuan an hmel leh an awm danah te pawh hian mi dang ai thlawt chuan an tih tak tak hmel deuh te hian ka lo hre ve thin. Kan chhungril lam nihna tak hi chu engemawti tak hian hmel atang hian a lo hriat theih mai thin bawk si a. Chutih rualin anni pawhin an intiamna ang ngeiin Kalphungthar hi chu kawng engkimah an hre reng tur a ni ang.
Chuvangin, nihna invuah leh hna chanpual, department chan, portfolio tih vel ai hian, an thil tih leh an awm dan, an rah chhuahah zawk zel hian mipuite hian kalphung thar chu kan lo beiseiin kan lo hmu zawk tur a ni ang. Chutiang chu anni pawhin lan chhuahtir an tum zel tur chu lo ni zel bawk rawh se. ZPM sawrkar leh Pu Lalduhawma hian, ‘E khai, kum thum chhung kalphungthar kan entir tawh che u a, kan peih tawh lo. Chief Minister leh party president nihnate hi ka’n chelh kawp tawh anga, kan han tal hiar vel ve tawh ang e. Tun atang chuan sawrkar hmasate angin kan han khawsa ve tawh ang e aw’ an tih hi chu i lo ring phal lo phawt mai ang u hmiang. Tin, engemaw a tulna avanga party president leh CM nih kawp an lo rem tih leh tak avang hian mipui rilruah hian ZPM hi chhe ta viau turah pawh i dah lo bawk ang u. Chuvangin, opposition ho sawi tur hre lo lutukte hmuia chithlum tahsak ang vel lekah ngai ta mai zawk ila.
Mipuiin ZPM sawrkartir kan chak em emna chhan leh sawrkar tha danglam bik, Kalphungthar hmuh theih ngei kan lo beisei theihna chhan lian tak chu, ‘Val Upa Council’ awm tur kha a ni. Mahse, an han sawrkar ta chenga, VUC chu thehmeh ang hlauh mai, an thawm kan hre ta mang hauh lo mai a. Pawnlam, mipui nawlpui hriat ve loh tur hian chhunglamah hian thurawn te hi an lo inpe ve fo thinin an lo inzilh ve zauh zauh thin zawk em ni le? Nge ni, zilh leh thurawn pek pawh ngai lo khawpin sawrkar hi a kal tluang tha hle zawk em ni ang? Nge ni, zilh leh thurawn pek ngam loh khawp leh zilh leh thurawn pek pawh sawt chuang lo hian ZPM sawrkar hi a lo awm zawk ta mai em ni dawn le? Nge ni, kan Valupate hi an upa mah mah tawh deuh a, engmah hi an sawi peih vel tawh lo mai em ni? Chuti te a lo nih phei chuan, VUC hming pu tho si emaw, hming dang vuahin emaw, tlema la thalai deuh zawkte hi sawrkar vengtu tur hi han ruat leh ta mai se la, tih te pawh hi rilruah a lo awm ve fo thin a nih hi.
Hei, tunah pawh Val Upate sawi tur zawk niawm tak chu kei takngial pawhin thil pakhat ngaimawh deuh sawi tur ka neih ve tak hi. A tul hle emaw, a thuin a zir hle emawte a nih ngawt loh hi chuan kan Chief Minister hian a thusawi danah hian, ‘Ka’ tih hi hmang fo lo se la, ‘Kan’ te hi han ti thei ta thin se la chuan, a lo ngaithlatute beng hi a dam kim tlang zaih ni mai tur, te pawh ka han tih ve phah tak hial mai mai hi.
A thlawna thil sem chungchang chu hun dangah sawi leh tum ta ila.