Vun rawng vanga diriam tawk Vinicius lawm lo

Vun rawng vanga diriam tawk Vinicius lawm lo
Mestalla khelmuala sikhat faia Real Madrid tlawm zanah Brazilian mihang striker Vinicius Junior chu Valencia tantute’n a vun rawng avangin an diriam leh chiam a, inkhel pawh a khaihlak phah hial a; hun pekbelh minute sarihnaah Hugo Duro nena an inbakkaih avangin kut thawh case-in Brazilian hi hnawhchhuah a ni a, a lawm lo ngang mai!
A vunrawng avanga diriam leh hmusit hlawh thang tawh Vinicius-a thinrim tawngkhawng hian Spain hmerin a hmer tawh mai a! A eizawnna ram chu racist rual tawmbuk tia hriat thin a nih thu a sawi!
Kum 22 mi hian tawngkam a sumkar duh tawh bik lo a, a khelh mekna Spanish top flight pawh dim duh bik tawh chuang loin, “La Liga neitute chu racist-ho an ni,” a ti.
Sawizawmin, “Engngemaw lai khan he cham-pionship hi Ronaldinho, Ronaldo, Cristiano leh Messi-te ‘ta’ a lo ni tawh thin a, vawiina La Liga erawh chu vun rawng, sakhaw biak, hnam leh nihna ena mi hmusit leh diriam ching racist-te kutah a tlulut tawh,” ti hialin Instagram lamah a tarchhuak.
A la duhtawk mai lo a, “Vawiina ka thil tawn ang kha a vawikhatna a ni lo a, a vawihnihna leh vawi-thumna pawh a ni hek lo. Racism hi La Liga-ah chuan thil narana ruat a ni a, he competition hian eng he huah a ngai lo mai ni loin thil pangngaiah a dah nghet hmiah a, federation pawh an bang chuang lo a, kan tumpuite phei kha chuan an chawisang a ni ber.
“A tira min lo welcome-tu he ram hi a mawi a, kei pawhin ka hmangaih a, mahse, khawvel hriatah racist country a nihna a phochhuak ta tlat a, he mi pawm thei lo Spaniard an awm chuan pawi ka ti hle a, mahse, vawiin hian Brazil ramah chuan Spain hi racist ram tia hriat a ni tlat.
“Vanduaithlaktakin, chawlhkar tin mai hian thil thleng a awm ta ziah a, kei hian inphenna ka nei lo tih ka pawm hmiah tawh a, mahse, ka chak ve tawk a, racist-te hmachhawn leh do hian a tawp thlengin ka pen zel dawn, tuna kan thlen chin atang hian kan hneh hun tur la hla vawng vawng teh mah se,” a ti.
BBC Sport tarlan danin Pathianni zan Mestalla khelmuala chi inthliarna lam hawi zawnga Vinicius diriamtu fan-te kha hriatchhuah an ni tawh a, Valencia lam chuan damchhunga an stadium lut thei lo turin an hrem dawn niin a lang.
La Liga pawhin thuchhuah siam ve tawhin, diriam leh chhaihnawmnah hlawh thang Brazilian laka nungchang leh tawngkam bawlhhlawh chehtute an chhui tur thu leh chi leh hnam, vun rawng avanga inhuatna thil (hate crime) an hmuchhuak a nih chuan hremna lek loa chhuah an tum loh thu an sawi a, khami zana stadium chhunga awmte zingah thil thlen dan video lo kawl tha an awm chuan an hnena thehlut turin an ngen nghal.
Twitter-ah La Liga president Javier Tebas tawngchhuak bawkin, a tuartu ni thang Vinicius chu racism dona kawnga sawiho puiah tum hnih an sawm hlawhchham tawh tih a sawi a, Brazilian khak tel zauhin, “La Liga dem leh sawisel hmain nangmah lam pawh i inherrem ve phawt a ngai,” tiin.
He thil hian Vinicius a tithinrim zual a, racist-te zawk dem ta loa Tebas-a’n amah a kawh teh daih thu leh La Liga chu hremna lekkawh ngei tura a phut thu a auchhuahpui ve leh nghal.
Pathianni inkhelah khan Vinicius Jr. chuan amah aunawmnahtu zawnga Valencia fans lam a buaipui avangin second half minute 70-ah referee Ricardo de Burgos Bengoetxea chuan inkhel a titawp lailawk hial a; a chet dan kha a team-mate rualte mai bakah Valencia player-te pawhin an thlawp tih chetziaiin an lantir ve nghal.
Real Madrid manager Carlo Ancelotti pawh ngawi mai mai thei bik loin, stadium pumpuiin racism thawm an chhuah tiin a puh hial.
Italian coach chuan, “Vawiina kan thil hmuh hi pawmzam mi rual a ni lo. Stadium chhung kha racist-te thawmin a khat a ni ber.
“Vawiin hian football chungchang sawi pawh ka tui nek lo. Football chanchin sawiin awmzia lah a nei hek lo. Referee hnenah khan inkhel titawp mai turin ka hrilh hial a ni.
“La Liga hian harsatna a nei a, ka ngaihdan chuan Vinicius hi khawvela player pawimawh ber a ni. Khati ang racism thawm avang khan inkhel tihtawpna thamah ka ngai.
“Stadium pumpuiin player pakhat an diriam rawn a, inkhelh chhunzawm chi a ni lo. Sithum fai pawhin chak zawk ni mah ila he ngaihdan hi ka kenkawh tho tur a ni. Kawng dang a awm thei lo,” a ti.
Ancelotti hian a tuartu Vinicius-a chet dan kha hriatthiam theih a nih thu sawi chungin a khelh chhunzawm duh leh duh loh a zawh hnuah khelh zui zel a thlan thu a sawi a, “A lungawi lo takzet a, a thin a rim a, thil thleng kha kan chenna khawvela thlenga mawi pawh a ni lo,”a ti chhuak hial!
Hnawhchhuah a nih kha Vinicius tan La Liga bika red card a hmuh vawikhatna niin, amah diriamtute a beihlet dan pawhin tan a hlawh a; Fifa president Gianni Infantino pawhin Brazilian lama a tan thu leh Valencia khelmuala thil thleng ang kha Fifa-in a enliam mai mai theih loh thu sawi chungin Fifa dan dinglaia khati lam dona a tarchhuak nghal.
Infantino chuan, “Inkhel kha tihtawp hmasak phawt tur a ni a, a pahnihnaah player-te’n khelmual an chhuahsan tur a ni leh a, aurinna a lo ri ang a, player beihna mipuiin an chhunzawm leh chuan inkhel kal lai tihtawp a nih tur thu puan zui tawh tur a ni.
“Chutianga an tih hnuah inkhel chhunzawm lehin, fans lamin an nungchang chhe ngai bawk chhunzawm leh ta ang se inkhel tihtawp hlen tawh tur a ni a, pawisawi fans tihnawmnah lam team zelin point thum an hlawhchhuak tur a ni.
“He dan hi ram zawng zawng leh league tinah hman leh kenkawh vek tur a ni.
“A taka kalpui aiin a sawia sawi hi a awl zawk a, mahse, heti thak thaka kan kal ngei hi a ngai a, zirna (education) kaltlang pawhin racism hi kan do a ngai tawh,” ti hialin Valencia khelmuala thil thleng chungchangah a ka a ang.
Vinicius Junior thlavang hauhtute zingah chutiang lo tawk ve sek tawh England leh Manchester United defender hlui Rio Ferdinand telin, Real goalkeeper Thibaut Courtois pawhin minute 20-naah khan mipui lam atangin a team-mate chhaih leh diriamna atana zawngte hram anga hram ri a hriat thu a sawi ve bawk.
Belgian hian sawizawmin, “Vini khelh chhun-zawm duh leh duh loh kha kan innghahna a ni a, khelmual chhuahsan chu ti ngat se kei pawhin ka zui chhuak ve khawp ang, a chhan pawh khati ang thil kha pawmzam chi a ni lo,” tiin.
Brazilian football federation (CBF) president Ednaldo Rodrigues pawhin kum zabi 21-na laihawla khati ang thil La Liga kawtkaia hmuh leh hriat tur la awm kha pawi a tih thu leh engtia rei nge an la tawnbuak zel dawn tiin zawhna a zawt ve bawk.
Marca chanchinbua thawk journalist Juan Castro pawhin BBC World Service hnenah Valencia fans lamin Vinicius an diriam thu leh ‘zawng’ tia an koh thu a hrilh a, Spanish football-a harsatna an tawh thu leh a rang thei ang bera chu harsatna chu an tuamdam a tul thu tarlang telin, tun kha Vinicius laka khati ang thil vawi 10 a thlenna a nih tawh thu a sawi!

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More