Waqf Bill avangin inhnialna nasa thleng

Congess kaihhruaia Opposition party te chuan Lok Sabha a Waqf Amendment Bill pharhah an duhlohzia an lantir na hle a. He dan siam that tum hi State Waqf Boards te thuneihna kaihhnawih, Waqf property te survey leh encroachment te paih tumna a ni.
Legislation chuan 44 sections of the 1995 Waqf Act chu amend a tum a. Bill chuan Central Waqf Council leh state Waqf Boards te chuan member-ah hmeichhia pahnih an nei tur a ni a ti bawk a. Chumai bakah Waqf Board in sum a dawn te chu hmeithai, pasal then, hnuchham te hnenah sorkarin a rawt angin a pe thin tur a ni tih a ni bawk a. Hmeichhiain ro a khawm theihna chu humhim tlat tur ti bawkin, hei mai bakah hian Waqf body a non-Muslim member te an awm ve tur a ni tih chu thu inchuh nasat tur a ni bawk.
Bill sawihona neihah Congress MP KC Venugopal chuan Bill chu ‘draconian’ tia sawiin freedom of religion leh federal system beihna a ni a ti bawk a. Waqf board member atana non-Muslim ruat chu a duh loh thu a sawi bawk.
Opposition a party lian ber dawttu Samajwadi Party te pawhin Bill chu an duhloh thu sawiin, “He Bill politics thil taka ngaihtuah ngar ngar hnua kalpui anga pharh a ni. Election atan democratic process a awm laiin eng vangin nge midangte nominate kher a nih? Sakhuana thilah pawn lam mite community-ah an tel ve lo. Eng vangin nge Waqf body ah non-Muslim te an awm ve ang?” tiin party chief leh MP Akhilesh Yadav chuan a sawi a.
Samajwadi Party MP tho Mohibbullah chuan, “Hei hi Muslim-te laka injustice a ni. Tihsual lian tak kan nei dawn a, he Bill avang hian kum za tel kan tuar dawn. He thil hi sakhuana thila inrawlhna a ni” tiin a sawi.
A hma pawhin Yadav chuan BJP te chuan amendment hmathawhin Waqf board te ram hralh an tum a ni a ti a. “Waqf Board amendment tih vel hi chhuanlam mai mai a ni, defence, railway leh Nazul ram te hralh chu a tum ber a ni” tiin a lo sawi tawh bawk.
Trinamool MP Sudip Bandhyopadhyay pawhin amendment siam tumna chu federalism kalh a ni a ti bawk a. DMK MP K Kanimozhi chuan minority community te kalha chetlakna a ni tia sawiin, “Christian leh Muslim ten Hindu temple ah thuneihna an nei ve thei ang em?” tiin zawhna a siam bawk.
Union Minister leh BJP ally JDU MP Rajiv Ranjan Singh chuan Bill chu Waqf board te langtlanga siam tumna zawk a ni tiin a thlawp thu a sawi thung a. Opposition tena Bill chu minority te kalh zawnga hmalakna an tih chu chhang letin Prime Minister Indira Gandhi thihhlima anti-Sikh riot kum 1984 a thleng chu sawi langin, “tu in nge Sikhs sang tel that?” tiin zawhna a siam ve thung.
NCP MP Supriya Sule chuan sorkar chuan House a Bill a pharh hma in inrawntlanna tha a kalpui lo a ti a. “Khawngaihin, inrawntlanna tha a awm theih nan standing committee ngaihtuah turin dah rawh u. Bill putluh hun pawh hi a ngaihthatthlakloh, Waqf board ah eng nge thlenga hmanhmwh taka Bill in putluh?” tiin a sawi bawk.
Indian Union Muslim League MP ET Mohammed Basheer leh K Radhakrishan, CPM MP te pawhin Bill chu an duhloh thu an sawi bawk a.
AIMIM MP Asaduddin Owaisi pawhin a duh loh thu sawiin inthleibikna leh Constitution basic structure beihna tiin judicial independence a bawhchhe tlat a ni a ti a. “Sorkar hian Muslim tena Waqf property te an enkawlna nasa taka khuahkhirh a tum a ni,” a ti bawk.