‘Warning’ pek tawh hnua kal luite kuhva rah a kang

Hachhek biala dan loa kuhva ro phurh luh chu June 19 zan khan a kang a, an phurhna lirthei leh a phurtute erawh an him.
Mamit district bawrhsap-in a khap mek a nih avangin an huamchhungah dan loa kuhva rah phur lut lo tur leh, a ti lui an awm a nih chuan an chunga hma lak a nih theih thu an lo sawi lawk tawh hnuah Hachhek Bial Kuhva Chingtu Pawl (HBKCP) duty-te chuan Thawhtanni zan dar 6:00 – 7:00 inkar khan Kawrthah leh Rengdil inkar Ramrikawnah kuhva ro quintal 100 chuang an man leh a, an manna hmunah unload-in a kangral nghal vek a ni.
HBKCP duty-te man kuhva phurtu Hyva-Ashok Leyland MZ 01K 9510 khalhtu, Lalramthara, Maubawk Vengin kg 80 dahna, kuhva bag 80 a phur a; Tata MZ 01S 6800 khalhtu Paumalsawma, Bawngkawn UPC Mualin bag 70 a phur thung.
Thudawn danin, man an nih lai hian kawngpui atanga quarry panna kawng penhleh deuhah dingin, balu phur angin an insawi ve ve a. An kuhva phurh hi ramdang atanga tawlh luh ruk kuhva-ah chuan a quality tha ber chi a ni. Kuhva ro an phurh hi Maduhi, Chaltlang Lily Veng ami ta niin a driver-te hian an sawi a, Champhai lam atanga lokal Aizawla inbanleta lachhawng niin an insawi.
Heti hian tunhnai ni thum chhungin HBKCP leh kuhva chinga eizawng mipui duty chuan dan phal loh kuhva ro truck lian trip 4 an man ta a, a vaiin quintal 300 vel a ni tih an sawi. HBKCP chuan ngenna a siam hlimchhawn laia dan loa kuhva tawlh man tur a la awm cheu chu hriatthiam harsa an tih thu an sawi a. Mipui lungawi lo sosang inkhap daih pawh a harsa sawt hle niin an sawi a ni.