Warriors an la tla bik lo

Ningani zing khan NBA play-off semi-final khelh chhunzawm a ni a. 3-1 a hnufual tawh Golden State Warriors chuan tlawm an pum-pelh a, final luh beiseina an nei chhunzawm zel. Inkhel dangah New York Knicks in Miami Heat an hneh ve bawk.
Final lut thei tura tlawm thiang tawh lo Golden State Warriors hian game nganaah an khingpui Los Angeles Lakers lakah an khel tha viau a, quarter thumna ah an inhnehtak zeuh tih loh chu quarter dang pathumah chungnung zawkah an tang vek. Hnehna chan ngei tum Warriors hi quarter khatnaah point liin chungnung zawkah an tang a. Quarter hnihnaah point 7 in chungnung zawkah an tang zui leh a. Point 11 a hmahruai chungin chawlhlawk an hmang.
Chawlhlawk hnu lamah LA Lakers in insiamthat an tum viau nanga an khingpuite an lehthal hleithei meuh lo. Quarter thumnaah an inhnehtawk viau a, point an thawhchhuah tam lohna quarter-ah hian point 23 ve ve thawkchhuakin an inhnehtawk. Point 11 a hmahruai tawh Warriors hi quarter hnuhnung berah point 4 in an chungnung zui leh a, point 14 in an chak zui ta a ni.
LA Lakers lakah 3-1 ngawt hnufual tawh chunga huaisen taka inlan Golden State Warriors tan hian an player pawimawh Stephen Curry chuan point 27 a thawkchhuak a, a chetha thawkhat hle. Point 121-106-a an chak tum hian champion lai Warriors tan hian Andrew Wiggins chuan point 25 a thawkchhuak a. Draymond Green pawhin point 20 a thawkchhuak ve bawk. Warriors an ngam loh tum hian LA Lakers player pawimawh LeBron James chuan point 25 a thawkchhuak. N ingani zingah Warriors hneh lovin tlawm mah se LA Lakers hian final luh theihna hun tha tak an la nei a. Khelh hmabak game hnih an la neihah final lut turin vawi khat chak chiah an mamawh tawh.
Ningani zinga inkhel dangah New York Knicks pawhin tlak an pumpelh ve bawk a, an khingpui Miami Heat chu point 112-103 in an hneh. Nicks hi series-ah 3-2 in hnufual zawkah la tang bawk mah se final luh beiseina sang zawk an nei thar tho thung.
Chak loh hleka tla nghal vang vang tur New York Nicks hian Heat lakah bul an tan chhe viau a, quarter khatnaah point 10 zetin hnufual zawkah an tang nghal. Chhe takin bul tan mah se an insiamtha thuai thung. Quarter hnihnaah Nicks hi point 13 zetin chungnung zawkah an tang a. Point thuma hmahruai chungin chawlhlawk an hmang.
Chawlhlawk hnu lamah Nicks an khel tha chhunzawm a, quarter thumnaah point 7 in chungnung zawkah an tang zui leh. Quarter hnuhnung berah point khatin hnufual zawkah tang bawk mah se an hmahruai tawhna point 9 an humhim a, hnehna hlu tak an chang zui ta a ni.
New York Nicks tan hian Jalen Brunson chuan point 38 a thawkchhuak.