WC thlengtu Australi an tlawm

Australia leh New Zealand-a hmeichhe World Cup khelh mekah a thlengtu Australia chu uiawm takin an chak lo va, Nigeria in an lehthal. Inkhel dangah Argentina in tlawm an pumpelh hram a. England in Denmark an hneh ve thung.
Inelna thlengtu Australia leh Nigeria te hi Brisbane Stadium-ah an inhmachhawn a, mualneitu hian goal thun hmasa mah se an mikhual er let an dawl zo lova, point an hlawhchhuak zo lo. An mualah an chak zawh loh vangin tla thei dinhmunah an ding a. Last 16 lut turin an khelh hnuhnung berah an chak ngei ngei a ngai tawh dawng.
Australia leh Nigeria te an inkhelh tum hian goal a lut lawk thei lo. Goal thun tuma an innawr fe hnuin chawlhlawk dawn hnaih, hun pek belhah goal khat ve ve an thun ta thung. Minute Emily van Egmond chuan Australia hmahruaina goal a thun. Hmahruaina goal an thun hnu lawkah goal an chhuah zui leh nghal a, Nigeria tan Uchenna Kanu chuan minute 45+6-ah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Nigeria an khel tha chhunzawm a, goal thun hnih an thun belh. Minute 65-naah Osinachi Ohale chuan hma an hruai letna goal a thun. Hma an hruai hnuin an khel tha chhunzawm viau a, mualneitu an nawr na zui ta viau. Na taka an khingpuite an nawr rah an seng a, minute 72-naah Asisat Oshoala chuan Nigeria goal thumna a thun a, an hmahruaina a ti zau.
Goal hnih ngawta an hnufual hnuin Australia in an si phurh suta, tlawm pumpelh ngei an tum a, goal thun tumin tan an khawh nasa hle. An muala khel an ni a, inkhel entu thahnem takin an au phur reng bawk a, zuai hauh lovin an khingpuite an nawr chhunzawm zel. Huaisen taka an khingpuite an nawr hi an hlawkpui a, hun tawp dawn hnaihah goal an thun ta nge nge. Minute 90+10-ah Alanna Kennedy chuan goal thunin an si phurh a sut then. An si phurh sut zawh tum viau mah se hun in a daih lova, an tual zawlah ngei uiawm takin an tlawm ta a ni.
Group B-ah hian Point li hmuin Nigeria in hma an hruai mek a. An hnuai chiahah hian point 4 tho hmu mek Canada an awm ve bawk. Australia hian point thum an hmu tawh a, last 16 lut thei dinhmunah an la ding. Hetihlai hian Republic of Ireland erawh chu vawi hnih tlawm zawn tawhin an tla chiang tawh thung a. Khelh khat khelh hmabak la nei bawk mah se an tan beisei tur a awm tawh lo.
Argentina an chak zo lo
Argentina chu mipa lamah World champion ni mek mah se hmeichhe lamah erawh an ropui hran lo va, World Cup khelh mekah vawi hnih khel tawhin point khat chiah an hmu a, an dinhmun a chhe tawh hle. Argentina hmeichhe team hian zirtawpni khan South Africa an hmachhawn a, si hnih an phurh hmasak zet hnuin tlawm an pumpelh hram thung.
South Africa hian Argentina lakah bul an tan tha viau a, goal hnih thun hmasa zawkah an tang. Minute 30-naah Linda Motlhalo chuan hmahruaina goal a thun a. Minute 66-naah Thembi Kgatlana hmangin an goal hnihna an thun zui leh bawk. Si hnih faia hma an hruai vangin an dinhmun a tha viau tawh.
Si hnih faia hnufual tawh Argentina hian tlawm pumpelh hram tumin thapui an thawh a, goal hnih thunin point an hlawhchhuak ta nge nge. Minute 74-naah Sophia Braun chuan goal thunin an si phurh a sut then a, Romina Núñez chuan minute 79-naah goal thunin an si phurh a sut zo zui leh. Hnehna chan tumin tan an khawh zui dun nasa viau a, hun tawp thlengin goal a luh belh thei lova, 2-2 in an inhnehtawk zui ta a ni.
Argentina awmna Group G-ah Italy leh Sweden ten point thum an hmu tawh a, an ni pahnih hi an inhmachhawn zui ve leh a, result kan hre hman lo. An inkhela chak zawk zawkin last 16 an lut chiang ang a. An inhnehtawk a nih chuan Argentina leh South Africa dinhmun a chhe leh zual ang.
England an chak nawn leh
Group D-ah vawikhat chak tawh ve ve England leh Denmark an inhmachhawn a, minute rukna leka Lauren James goal thun hmangin England an chak. Denmark lakah an chak vangin England in last 16 an hnaih viau tawh a. Last 16 lut chiang tawh tluk an ni. Denmark tan last 16 lut turin an khelh hnuhnung berah chak ngei a ngai tawh ang.