David Silva a chawl ta

On Jul 29, 2023 20 0

David Silva a chawl ta
Manchester City leh Spain midfielder pawi-mawh ni thin David Silva chuan football a chawl-hsan thu a puang.
Kum 37 mi David Silva hian Real Sociedad tan pre-season training an neihna lamah hliam a tuar a, a khup hliam hi a serious viau. Hliamin a tihbuai vangin football a chawlhsan thut a. Fooball a chawlhsan tak hnu social medai lamah a tar lang. “Vawiin hi ka tan chuan ni tha lo tak a ni a, football ka mangtha thu ka sawi a lo ngai ve ta. Vawiin hian ka khelhpui chhungkua ang maia ka ngainat em em te ka thlah a lo ngai ta. Ka ngai dawn tak zet che u” tiin inthlahna thu a sawi a. Kum 19 chhung zet a lo khelh tawh football chu a chawlhsan ta a ni.
Midfielder hriat hlawh tak David Silva hian Valencia atangin football nun bul a tan. Valencia atangin hian Eibar leh Celta Vigo-ah loan in a khel chhuak. Valencia senior team-ah hmun pawimawh a chan hnuin a hming a chher ta viau a. Kum 2010 khan Premier League club lian Manchester City in an la lut. EPL club Manchester City-ah a vul chho ta viau. City hi Premier League-ah vawi li a champion pui a. FA Cup-ah vawihnih a champio pui bakah League Cup-ah vawinga a champion pui bawk. City tan hian inelna hrang hrangah vawi 436 zet a khel a, goal 77 a thun. Club tan a khelh that theih em vangin City tana a khelhpui thin Vincent Kompany leh Sergiu Aguero te nen Etihad Stadium pawnah an lim din a ni nghe nghe.
Manchester City-ah kum 10 zet hun a hman hnuin kum 2020 khan La Liga club Real Sociedad a zawm. Real Sociedad tan hian inelna hrang hrangah vawi 93 a khel a, goal 7 a thun hman. Real Sociedad player pawimawh la ni bawk mah se hliam vangin a tum aia hmaah a chawlh a ngai. Silva hian football a khelh chhungin club hrang hrang tawn vawi 783 zet a khel a, goal 125 a thun.
Spain rawlthar team hrang hrang tan a khelh chhoh hnuin kum 2006 atangin Spain senior team tan a khel tan. Spain tan hian inelna hrang hrangah vawi 125 a khel a, goal 35 a thun. Ram tan hlawhtlinna lian tak tak an chang. Kum 2010 World Cup-ah an champion a. Euro 2008 leh 2012-ah an champion bawk. Ram tan hla-whtling taka a khelh hnuin kum 2018 khan international football a chawlhsan. Player lar leh hlawhtling tak David Silva hian kum 37 mi lek ni chungin football a chawlhsan zui ta a ni