Weekend chauh a zu in thin tan a pawi tho em?

Weekend chauh a zu in thin tan a pawi tho em?
Mi thenkhat han ti ila, a tam zawk mah kan ni awm e, chuan kartluana zu in loh a, kartawpah, Zirtawpni zan emaw, Inrinni emaw atanga han inthlah dul a, an lem deuh pap pap chu thin (liver) tan pawha pawi lo deuh zawk tura ngai kan ni awm e. Mahse, mithiamte chuan zu-in i in ni kha a rawn thliar ve tawh chuang lo, an ti. Thawhtanni a in leh Inrinni a in khan taksa a thawh dan a danglam chuang lo. Kan taksa a zu a luh tawh hrim hrim chuan thin (liver) a kaltlang vek a ngai. Thin hi mahni tawka insiamtha ve le thei ni nain, theih loh chin a nei ve thin. A pawi ber chu tum khata in teuh hi a ni. |um khata zu kan in tam lutuk chuan thinin hnathawh tur a ngah ta lutuk a, lo thlifim zung zung tura kan ngaih angin ngai a awh leh mai bik thin tlat lo.
Tun tumah hian Max Super Speciality Hospital a Gastroenterology & Hepatology-a Principal Consultant Dr. Pallavi Garg thukhawchang Times of India-a an tarlan kan rawn chhuah chhawng e.
Mi tam takin kan rindanah chuan weekend a kan zu in chu kartluana kan ‘dry’ leh chuan kan thin pawhin ngai a lo awh leh hman tawhin kan ring a, hei bakah hian kan zu in ‘quality’ a that chuan thin lama thawk nêp deuh zawk turah kan ngai bawk. Mahse, chutiang a ni ngawt lo.
A nih leh, kartluana zu in loh a, kartawpah chauh a in chu a pawi nêp deuh em? Kartluana in ai chuan tha zawk e le. Mahse, i kartawp zu in chu i beih chiam a, chintawk lem nei lo a rui thlep hnawp khawpa i in thin a nih chuan i thin tan a pawi tho tho.
I kartawpa zu in chu i beih nasat viau chuan Thawhtanni – Zirtawpni i ‘dry’ leh chhung khan i thinin ngai a awh leh hman lo ang a, a lo insiamtha hman dawn lo, Weekend apianga i bei chiam zel a nih chuan i thin kha insiamtha hman loin a inkhawlkhawm ve leh zawl dawn a ni.
Chutihrualin, nitina zu in loha, ‘dry day’ neih chu chutiang neih loh ai chuan a tha zawk ngei a, mahse, kan kartawp zu in chu kar tluana nghei tawh chhilh nan ti ang hrima kan bei chiam mai zel a nih chuan thin a lo insiamtha hman bik tlat lo a, chu chu kan kartin chin dan a nih chuan a pawi ta thin a ni.
Mithau lutuk (obese) tawh sa, zunthlum nei, insulin resistance, thin lam natna nei tawh- hepatitis B, chronic hepatitis C, thisen zawmpui zinga thin lam natna nei awm tawhte tan a tum khata zu in teuh (binge drinking) chin hian thin natna risk a sang lehzual a, zu in nasa rau rauah mipa aiin hmeichhiain an daih rei lo zawk bawk. Hetihrual hian midang tan a risk a awm lo tihna a ni chuang lo a, mahse, hetiangho tan hian a risk a sang lehzual tihna a ni.
Zu in loh theih a tha ber a, kan in duh tlat si a nih chuan tum khata in ngheng (binge drinking) hi pumpelh tur a ni. Kartawpa an in deuh chiam (weekend binge drinking) hi nitina zu in nen a pawi dan a inang reng thei a, nitina tlem tlema in ai pawhin a lo pawi zawk ma thei. Thin hriselna ngaihtuah chuan weekend chauha zu in hi a him zawk tura mi tam takin kan ngaih ang a lo ni kher lo thei tlat.