Karnataka Chief Minister atan Siddaramaiah chu lak luh a ni leh ta a, kum 75-a upa ni tawhin kum 2013 atanga 2018 chhunga Chief Minister lo ni tawh a ni bawk a. Mirethei leh nawlpuite nena inzawmna nei tha tia sawi a ni.
Shepherd community (Kuruba, OBC caste) chhungkua atanga piang niin chhungkaw hasratna avangin school pawh kal mumal thei lo a ni a. Bawng vulh laite enkawlin a chang chuan a hun awlah Veera Makkala Kunita troupe-ah telin temple-ah te an lam thin bawk.
A theihna hriain local teacher chuan Class 4-ah direct-in a luhtir a, Siddaramiah chuan Mysore University atangin B.Sc a zo va, an chungkaw zinga degree nei hmasa ber niin a hnuah Law a zir leh bawk.
Kum 2013-a Chief Minister a niha Cabinet meeting neih hmasak berah khan Anna Bhagya (free rice) scheme chu kalpui tur a nih thu a puang nghal a, a tum ber chu Karnataka-ah riltam an awm tur a ni lo a ti, a naupan laia a chehhvela riltam mangang a hmuh chu hmuh a duh tawh lo.
Chief Minister tum hnihna a nihnaa lakluh a nih veleh, Congress manifesto welfare scheme te kalpui a ni ang a ti nghal bawk a. Siddaramaiah hi Socialist Roammanohar Lohia idals latu niin Lohia vang hian welfairism lamah rinna a nghah phah tiin a sawi nghe nghe.
Siddaramaiah hian kum 1970-a Karnataka-a Socialism lar vanglaiin politics a luhchilh tan a. Khatih lai khan kum 1978 khan Taluk Development Board member a ni a. Karnataka-a farmers’ movemnet bul tumtu leh Karnataka Rajya Raitha Sangha dintu M.D. Nanjundaswamy nena inzawmna an neih chuan nasa takin a politics thlir dan a nghawng tiin a sawi. Kum 1980 Lok Sabha inthlanah khan candidate-in a chak lo va, kum 1983-ah Assembly election-ah ding lehin Lok Dal party ticket-in Chamundeshwari-ah thlan tlin a ni.
Legislator a nihna angin Ramakrishna Hedge kaihhruai Janata Party sorkar a thlawp a, Kannada Kavalu Samiti (Kannada Watchdog Commitee) chairman atana ruat a ni a. Linguistic leh regional pride aupui chu a politics kalpui dan niin chu chu Chief Minister a nih hnu thleng pawhin a bansan lo. Kum sawm li chuang politics a khelh chungin chak leh hloh pawh a ngah a, Janata Party, undivided Janata Dal, Janatadal (S) ah te awm tawhin kum 2006 khan Congress a lut a ni.
-- Advertisement --
Congress a luh
Siddaramaiah an Congress a luhna chhan chu JD(S) patriarch H.D. Deve Gowda nena an intihthiam loh vang niin kum 2004 khan Congress-JD(S) sorkar siamah Chief Minister ni tura a inngaih laiin Dharam Singh zawk thlan a nih vang a ni a. He mi hnu hian AHINDA (Kannada tawnga minorities, backward classes leh Dalits te) inhmuhkhawmna Hubballi a a huaihawt chu party kalh tiin hnawhchhuah a ni a. Regional party a din dawn emaw tih laiin Siddaramaiah chuan kum 2006 khan Sonia Gandhi chuan Congress ah a lawmlut a ni.
Siddaramaiah chuan Congress tena secularism chawinun an tum tlat chu a luhna chhan ber tiin a sawi a. A sawi anga ding nghet zuiin Hindutva politics sawiseltu langsar ni zui zelin BJP tena ‘anti-Hindu’ an tih pawhin a zam eih ngai lo. Siddaramaiah political career ah chuan welfairsm leh secularism chu a pawimawh lawrlak a ni.
Leader of Opposition a nih laiin kum 2010 khan Bengaluru atanga 320 km laia thuiah kawngzawhna Ballari Padayatra a huaihawt a, hei hi dan kalha Gali Janardhan Reddy leh a thuihruai tena mining lam an thunun a duh lohna lantirna a ni a. He ta tanga sum hmuh te hi ‘Operation Kamala’ tih mai kum 2008-a BJP-in MLA rualte lei nana hman tia sawi a ni. Kha Padayatra kha kum 2013 inthlana Congress tena chakna an chan phah theih nana sulsutu an ti.
Kuminah erawh Chief Minister post inchuhna nasa tak awmin KPCC president D.K. Shivakumar nena inbakkaihna a nasa hle a, inthlan result puan hnuah pawh ni li lai CM nihna chelh zawk tur tihchian nan hun mamawh a ni a. Shivakumar chuan Deputy CM nihna pawmin party tana rinawm a nih angin tlawm zawkah a tang tia sawi a ni. Tun thleng pawhin Siddaramaiah hi a tira Congress ni sa lo a nih avangin Congress party chhungah pawh amah duh lo leh beitute chuan ‘pawn lam’ mi an la tih fo a ni reng a. Mahse, Karnataka-a rethei a nawlpui tam zawk tena an thlawp a nih tlat avangin hnawl mai mai theih a ni hauh thung lo a ni.
Tun tum erawh Siddaramaiah chu a hma aiin a fimkhur a ngai dawn tia sawi niin seat 135 an neihah fimkhurna tur a ngah an ti a. A bik takin party pawn lamah pawh Lingayat, Vokkaliga leh Brahminte Siddaramaiah AHINDA politics atanga anmahni dodaltu anga ngaite lakah a fimkhur a ngai hle tura ngaih a ni.
Sorkar hotulu ber a nih angin inthlana an thutiam te tihhlawhtlin ngei a ngai dawn a. Social welfare “guarantees” an tih te chu a taka kalpuia tihlawhtling vek tur chuan sum lam mamawhna pawh a sang hle dawn a.
Congress ten auhla bera an neih leh BJP te an namthlakna pawimawh chu BJP sorkar kha ‘40% sarkar’ tih a ni a, tunah chuan eirukna lama fihlim te, caste group buaina chinfel te leh thutiam tihhlawhtlin ngei te chu tihmakmawh a ni dawn a ni.