Thawhtan zan khan English Premier League-ah inkhel pakhat a awm a, Newcastle United chu an mikhual West Ham United lakah si hnih faiin an tlawm. An mualah an tlawm vangin Newcastle United hian paruknaa inhlankai an tumna an puitlin zo lo.
St James Park a lenglut West Ham hian bul an tan tha viau a, an chung palinaa awm mek Newcastle lakah goal pawh an thun hma hle. Hma taka goal an thun vangin an phur a, inrintawkna sang tak nen Mimualah an inlan zui theih phah. Table-ah hmasawn dawrh tuma tan khawh Newcastle hian hun tawp thlengin goal an thun thei lova, an mualah an tlawm vangin 10-naah an awm a ngaih phah ve thung.
Newcatle hian an mikhual West Ham hi inkhel tir lamah an nawr tlang nghal a, Arsenal in lak tuma an hel mek Alexander Isak chuan cool zetin a pet goal a, hmahruaina goal a thun. Isak hi a lo pawng hret a, offside vangin a goal thun hnawl a ni a, Hammers an him. Isak goal thun hi pawm ni ngat se Hammers tan chak let a har viau tura ngaih a ni.
Offside vang an him hlauh hnuin West Ham hian goal thun theihna hun tha an nei a, goal thun hmasa zawkah an tang ta zawk. Hammers tan hian Tomás Soucek chuan minute 10-na lekah fuh zetin a tauh goal a, hmahruaina goal a thun.
Hma takah goal an thun vangin Julen Lopetegui-a team West Ham an phur a, inrintawkna sang tak nen an inlan chhunzawm. Chawlhlawk hmain goal luh belh awm thei lo mah se chawlhlawk hnu lamah goal an thun belh leh thuai. Minute 52-na lekah defender Aaron Wan-Bissaka chuan an goal hnihna thunin, an chakna a nem nghet. Hammers hian hun tawp thlengin goal an chhuah lova, St James Park-ah ngei mualneitu Newcastle United an hneh a, point thum hlu tak an hmu zui ta a ni.
West Ham an chak
Get real time updates directly on you device, subscribe now.
Prev Post
Next Post