West Ham boss thar Lopetegui

West Ham United chuan David Moyes thlaka head coach thar atan Julen Lopetegui an ruat.
Kum 57-a upa Spaniard Lopetegui hian tunthla tir lam khan Hammers enkawl turin tawngkaa inremna a lo tifel tawh a, tunah kum hnih daih contract ziak felin, an inremnaah pawl pahnihin an remtih tlan chuan kum khat dang London club a enkawl chhunzawm thei ang.
Nikum August thlaa Wolves a chhuahsan hnu khan Lopetegui hian hna vawn lai a nei leh ta lo vang vang a, West Ham nena inremna an ziahfel hnuah a hlim em em tih sawi chungin, “Heti ang club lian hmalam huna ka tel ve tur hi ka tan hun tha a ni a, West Ham-in min thlang ka lawmna chu he club hi kei pawhin ka team thar atana lungthlu taka ka thlan a nih vang a ni,” a ti.
Tunthla tir lam khan West Ham hian a vawihnihna atana December 2019-a an rawih nawn leh Moyes chhuah tur thu an nemnghet a, nikumah British coach hian Europa Conference League title lakpui mah se tun season tawp ruala chhuak turin inremna an sawifel zui ta a ni.
Kum 61 mi Scot Moyes-a hnuaiah Hammers-in result tha neih an harsat a, Premier League-ah pawh pakuana daih niin, a zawna season lina atan Europe tournament an khel pha lo nghe nghe.
Boss thar Lopetegui hian official-in a hna thar hi July ni 1-ah a zawm dawn a, chu chu season thar atana club inbuatsaih tan hun niin, United States lama chawlhkar hnih an cham chhungin Crystal Palace leh Wolves nen an inkhel ang.
Spain leh Real Madrid coach hlui hian kum 2020 khan Sevilla chu Europa League trophy a lakpui a, November 2022-ah Molineux panin, Wolves a zawm tirh chuan Premier League mawngphahah a team thar an awm.
Team a enkawl hnuah hmuh theihin an kang a, Wolves chu Premier League-ah 13-na nihpui mah se a club vawn chu sum lamah an talbuai zui ta tlat a, nikum nipui thawt lai khan a chhuak zui leh ta mai a ni.
Qoalkeeper ni thin Lopetegui hian football a khelh lai chuan Real Madrid leh Barcelona kutkawr a bun tawh a, Spain tan pawh vawikhat goal a veng ve tawh bawk.