West Ham in United an chelh

January 10, Thawhleh zan khan English Premier League (EPL) 2025-26 khelh chhunzawm a ni a. Table hnuai lamah awm a, tlahniam thei dinhmuna ding mek West Ham United chuan tun laia chetha tak Manchetser United an chelh a, 1-1 in an inhnehtawk ve bawk. United an chak zawh loh rual hian manager thar hnuaia chak tluang tak Chelsea pawh an chak zo bik lo.
United himna Sesko
Table-ah 18-na luah a, tlahniam thei dinhmuna ding mek West Ham United hian manager lailawk Michael Carrick hnuaia chetha a, vawi li lai chak zawn tawh Manchester United chu London Stadium-ah an mikhual. West Ham hian an mualah goal an thun hmasa a, an chak teuh hle nghe nghe. Hun pangngaiah an si phurh an sut theih loh hnuin Carrick hnuaia vul Benjamin Sesko chuan hun pek belhah goal pawimawh tak a thun a, an team tlawm tur a chhanhim.
West Ham hian an mikhual United lakah bul an tan tha viau a, inkhel tan tirh lamah United defender hlui Aaron Wan-Bissaka chuan a club hlui lakah hmahruaina goal a thun teuh hle. Wan-Bissaka pet tha tak hi United si nghak Senne Lammens chuan pui zetin a lo dang a, an team a chhanhim. Hemi hnu lawk hian United an hlauhawm zui ve leh nghal a, corner atangin goal an thun teuh hle. Luke Shaw shot tha zet chu Wan-Bissaka chuan goal line bul atangin a dang hman hlauh a, an team a chhanhim. Goal thun tuma innawr in, hlauhawm siam ve ve mah se chawlhlawk hmain goal thun thei an awm lo .
Chawlhlawk hnu lamah inkhel a hmuhnawm leh zual a, goal hnih hmuh tur a awm ta bawk. Mualneitu West Ham United an khel tha chhunzawm a, goal pawh an thun ta thuai. Hammers hian fuh takin United an nawr tlang a, an defender te an thiat nalh hle. A sir lam atanga a khalh luh hnuin Jarrod Bowen chuan Tomás Soucek tan a siamsak. Soucek hian singhak Lammens kap karah fing deuhin a pet lut zeuh a, West Ham in minute 50-naah hmahruaina goal a thun.
Goal thun hmasa zawk an ni hian West Ham a fuih phur viau a, an mualah phur takin an inlan. Goal an chhuah hnuin United an tang kawh thar ve leh a, goal thun tumin thapuitak meuh meuh an chhuah. United tan hian Casemiro chuan tauh goal in an si phurh sut bawk mah se a lo pawng hret a. Offside vangin Casemiro goal thun hi pawmsak a ni lo. United goal hnawl a nih vangin Hammers an la him hram hram zel.
An goal thun hnawl ni mah se United in tan an khawh zui zel a, an hlauhawm thei hle. Bruno Fernandes ball vawrh luh tha tak atangin Joshua Zirkzee chuan tauh luh theihna hun remchang nei bawk mah se uiawm takin a hlah hlauh thung. An hun tha hlah zel mah se hun pek belh tawp dawn hnaihah United an vannei ta nge nge. Bryan Mbeumo siamsak tha tak chu Banjamin Sesko chuan fing leh fuh zetin a pet goal a, minute 90+6-ah an si phurh a sut.
United in Nipui bazarah beiseina sang tak nena an lak luh Sesko hian Reuben Amorim hnuaiah beisei a phak lo va, sawisel a hlawh nasa hman hle. Amorim hnuaiah hun duhawm lo tak hmang bawk mah se manager lailawk Michael Carrick hnuaiah erawh a vul ta viau thung a. An nuihzat deuh hman kha United mamawh chhanna niin, United hlimna thlentu pawimawh tak a lo ni ta hial a ni.
An si phurh an sut vanga phur thar hluai United in goal thun belh theihn hun tha an nei zui tawh bik lova, 18-naa awm mek West Ham United lakah tlawm an pumpelh hram a, harsa takin point khat an hmu.
West Ham lakah chak zo lo mah se United hian palina an la luah chhunzawm a. An hnuai chiaha awm Chelsea an chak zawh bik loh vangin Top 4 huang an la luah nghet rih. Top 4 huangah United an awm zui zel laiin West Ham erawh tlahniam thei dinhmunah an la ding zui ve zel bawk. Hammers hian khelh 26 atangin point 24 an hmu a, 18-na luah zui rih mah se him an hnaih ve hret hret zel.
Chelsea an chak zo bik lo.
Thawhleh zana inkhel dangah manager thar Liam Rosenior hnuaia khel tha tak, United ang maia EPL lama chak zawn Chelsea an chak zo bik lova, an mikhual Leeds United nen 2-2 in an inhnehtawk.
Chelsea hian an mual; Stamford Bridge-ah bul an tan tha a, goal thun hmasa zawkah an tang. Fuh taka ball an inpek kual hnuin Joao Perdo chuan a tawp a khar tha. Pedro hian Cole Palmer ball pek fing leh tha tak chu a khalh tlang a, minute 24-naah inringtawk takin a pet goal a, hmahruaina goal a thun. Chak tura rin zawk Chelsea in goal an thun hmasa bawk mah se Leeds in tan an khawh ve tlat a, chawlhlawk hmain goal an chhuah belh duh bik lo.
Chawlhlawk hnu lamah Chelsea an khel tha chhunzawm a, goal an thun belh leh thuai. Leeds United defender Jaka Bijol in tul lo taka penalty a chawi chu penalty pet thiam tak Cole Palmer chuan minute 58-naah awlsam takin a pet goal a, an goal hnihna thunin, an hmahruaina a tizau. An mualah si hnih faia hma an hruai vangin Chelsea hi chak ngei tura ngaih ni hman mah se an che sual a, goal hnih an chhuah zawn tlat thung.
Team lian leh phur Chelsea lakah si hnih phur mah se Leeds an hnual ngawt lova, an buai ngawt hek lo. Leeds hian an si phurh sut ngei tumin tan an khawh a, hun tha an nei ve ta nge nge. Moises Caicedo penalty chawi chu Lukas Nmecha chuan minute 67-naah a pet goal a, an an si phurh a sut then.
Nmecha goal thun hian Leeds a fuih phur viau a, goal dang pawh an thun belh zui leh thuai. Chelsea tlarhnung chet fuh tawk loh leh si nghak Sanchez nen an inrinthulh deuh bawk vangin Leeds United in vanneihthlak ang reng takin hun tha an nei. Nmecha khalhchhuah pui zet chu Noah Okafor chuan minute 73-naah hnaite atangin a pet goal a, an si phurh a sut zo. 2-2 a nih hnuin Chelsea in an mualah chak ngei tumin tan an khawh zui chiam a, Cole Palmer chuan goal thun theihna hun tha nei bawk mah se uiawm takin a hlah tlat thung a, chakna goal a thun thei lo va, Blues hian an mualah ngei uiawm takin hnehna an chang zo ta lo a ni. Manager thar Liam Rosenior hnuaia vawi li chak zawn tawh Chelsea chu table hnuai lama awm Leeds United in an chelh ding ta a ni.
An mualah an chak zawh loh vangin Chelsea hian Manchester United leh pela Palina luah theihna hun remchang an neih an chhawr tangkai zo lo. Blues hian pangana an luah chhunzawm a, top 4 huang luah phak theihna hun tha tak an la nei zui reng tho thung. Chelsea chak tluang lai titawptu Leeds United hian khelh 26 atangin point 30 an hmu a. 15-naah awmin him an hnaih hret hret zel.