Wheelbarrow lir chak thei ber

Dylan Phillips chuan a wheelbarrow chu motor anga ama tawka tlan thei turin engine a vuah a, 52.58 mph (84.6 kmph) a chakin a tlan thei a, Guinness World Records-in wheelbarrow tlan chak berah a puang. Dylan hian a wheelbarrow hi a hunawl hnawh khah nan tiin engine a vuah a, hetiang lamah hian Guinness World Record siam theih a ni tih pawh a lo hre ngai bik lo. Mahse, a siam zawh hnuah record a siam theih tih hriain, a document leh evidence te GWR-ah thawnin, an nin an lo endik hnuah record a siam tih an puang ta a ni.
Dylan chuan, “Nuam ka tih ve hrim hrim vang leh hunawl hnawhkhah nan tiin he wheelbarrow hi ka siam a. Ka siam zawh hnuah ka han tlanpui vel chhinnaah 37mph (59.5 kmph) te chu ka hawlh ve ta mai a, chutiang hnuah chuan ka ngaihtuahnaah hetiang lamah hian record te a lo awm reng lo maw tih a lo lut a, kan han hawi zau deuh a, record a siam theih tih ka hre ta chauh a ni,” tiin record siam tum vanga siam hrim hrim a nih loh thu a sawi.
Dylan chuan, “A tlan chak tak hi a harsa lo zawk a, mahse, a din leh lai vel hi a buaithlak zawk, a brake hi a hmalamah chauh a awm a. A khalh pawh a nuam lem lo a, a hlauhawm ru duh phian zawk a, mahse, vawiin thlengin chetsual palh ka nei lo chu a nia, a nuam faran lo e tih a ni mai. Suspension a nei ve lo a, a sawh leh thin chu a na ve deuh. Mahse, record te an siam chu a nuam ve hrim hrim e,” a ti bawk.