White Cane Day pualin mitdelten tanpuina ngen

October 15 kha khawvel pum huapa mitdelte an chhuahvah tuma tiang var an hman tan ni – International White Cane Day a ni a. He ni pual hian Mizoram Blind Society chuan mitdelte tanpui thin turin mipui an ngen.
Mizoram Blind Society (MBS) thuchhuah danin, kum 1921-a thlalaka eizawng, James Biggs chu chetsualna avangin a mit a del a. A mitdel hnu hian khawlaia a chhuah changin tiang var a hawl thin. A tiang hawl, rawng var a hnawih chhan chu, lirthei khalhtute leh kawtthlera veivak midangin amah chu khaw hmu lo, mitdel hriatthiam ngai a ni tih awlsam taka an hriat theihna atana a tih a ni.
Khawvel hmun dangah pawh an lachhawng ve ta zel a. America rama mitdel association (The National Federation of the Blind) chuan Internatioanl White Cane Day hranpa serh turin thuneitute an nawr a. An ngenna azarah American Congress Joint Session remtih angin, hetihlaia US president LB Johnson chuan kum 1964 atang chuan October 15 chu International White Cane Day-a serh turin a ti a ni.
‘Internatioanl White Cane Day pual hian Zoram mipui, abikin lirthei khalhtute mitdel tiang hawla khawlaia kalte dimdawi thiam a, an tiang hawl zahsak turin kan ngen thar a. Zalen leh thlamuang taka khawlaia an veivah ve theihnan hriatthiamna nena tanpui thin turin mipui leh sawrkar, kohhran leh khawtlang hruaitute kan ngen a ni,’ MBS chuana ti.