Wimbledon 2023 prize money

Last updated Jul 19, 2023 10 0

Wimbledon 2023 prize money
Kumin Wimbledon-ah khan hlawh (prize money) an semchhuah zawng zawng belhkhawm chu a hma kum dang zawng zawng aia tam pound maktaduai 44.7 (USD 57.29 million) zet a ni a, nikum aia a punna rate hi 11.2% a tling.
All England Club chairman Ian Hewitt chuan Covid-19 hripui len hma chiah 2019 tournament-a singles champion-te leh runners-up prize money an pek zat kha kumina tluk chhoh leh chu an tum lian ber a nih thu a sawi.
Tarlan tawh angin, kumin hian Czech Republic player Marketa Vondrousova chu hmeichhe singles title hawntu niin, nikum final-a tlawm tawh Tunisia mi Ons Jabeur kutah runner-up trophy bawk a lut leh.
Mipa singles lamah Spaniard kum 20 leka upa Carlos Alcaraz a champion a, final-ah defending champion Novak Djokovic a hneh.
Mipa leh hmeichhe singles champion hian kuminah pawh hlawh inang dawngin, pound maktaduai 2.35 ve ve an rut a; runner-up pahnih kutah pound maktaduai 1.175 ve ve a lut thung.
Nikum men’s and women’s singles champion Novak Djokovic leh Elena Rybakina-te khan pound maktaduai hnih ve ve an hlawh a, kumin mipa leh hmeichhe champion-te hlawh zat an pha lo.
Grand slam tournament dang pathumte leh Wimbledon hlawh khai-khinna hi thlir leh thuak thuak ila.
Kumin kumtir lama khelh Australian Open champion pahnihte khan Australian dollar maktaduai 2.975 million (USD 2.05 million) ve ve dawngin, mipa champion Djokovic kha kum khat chhunga grand slam tournament hmasabera a vawi 10 chakberna niin, hmeichhe singles champion Aryna Sabalenka tan a major title hmasaber a ni ve thung.
June thlaah French Open hun a lo herchhuak leh a, record siama mipa zinga grand slam title 23 la tling thei awmchhun Djokovic leh a tum thumna’na Roland Garros title sualchhuak Iga Swiatek chuan euro maktaduai 2.3 (USD 2.51 million) ve ve prize money an hum haw.
Kuminah U.S. Open an la khel lo a, nikum New York khaw grand slam-ah khan Flushing Meadows-a champion thei naupang ber dawttu Carlos Alcaraz leh women’s singles title latu Swiatek kutah US dollar maktaduai 2.6 ve ve thun a ni.