Wimbledon-ah Serena kan hmu thut thei – Djokovic

2022 US Open hnu lama tennis inelna hmachhawn leh ngai ta lo Serena Williams chuan professional huang a luhchilh leh dawn nia ngaih theihin nikum khan inkhelh loh lai pawha damdawi khap chi hman leh hman loh enfiahna anti-doping pool-ah a inziaklut thar leh a, engtikahnge khelmual a luh leh ang tih zawhna a len chhoh zel laiin Novak Djokovic chuan kumin Wimbledon-ah hian a kir thut mai thei tih a sawi!
Kum 44-a upa Serena ‘comeback’ chungchangah a coach hlui Rick Macci chuan tunhnai khan American mihang player ropui chu tennis-ah a kirleh ngei dawn tih a lo sawi tawh a; Nilaini khan Djokovic a tawng chhuak ve leh a, a kirleh dawn a nih rau rau chuan Pi Williams-i hian kumin Wimbledon hi kirlehna tournament-ah a hmang mai thei niin a sawi a, Grand Slam title 23 a lak tawh belhchhah turin Serena hian khelmual a lut leh dawn em tih erawh player ka atangin a la ri chhuak lo thung.
Djokovic chuan Indian Wells-a amah bawrtu reporter rual hmaah American player chungchang sawiin, “A lokir leh dawn niin ka hria a, mahse, amah nen kan inbe lo a, chiang taka hriat ka nei lo a, chutih rualin a hawiher en hian comeback a hnai niin a lang.
“A lokirleh dawn a nih rau rau chuan kumin Wimbledon hi a kirna tur mual ni turah ka dah a, chu pawh ka chiang chuang lo. Rin dan han sawi zel takah chuan doubles tournament lamah Venus nen an inkawp duh hmel a; chuti ang a thleng a nih chuan ka thlirna atang leh tennis fans thlirna zawn atangin a duhawm khawp ang.”
Tennis superstar Djokovic hian he sport-a player langsar berte zinga mi a kirleh a nih chuan mi zawng zawngin an welcome dawn tih a sawilang tel.
2026 Indian Wells tournament atana training a kalpui mek laiin nimin vek khan mipa leh hmeichhia sawi loa Grand Slam singles title 25 la tling thei hmasaber ni tura major title pakhat chauh mamawh tawh chunga la hlawhtling thei tlat lo Novak Djokovic hi chauin a tlu thut a, Jelena Djokovic chuan a pasal chu a thawkrim leh lutuk a, a taksain a zo ngang lo niin a sawi!
Thla khat liamta mai khan Serb hian 2026 Australian Open final lutin, Spaniard Carlos Alcaraz a hneh lo leh ta rih a, major title 25 la tling tura a beih mekna kawngah hlawhtlinna a la chang zo lo tluang zel rih!
Tennis Channel analyst Prakash Amritraj pawhin Williams chungchang sawichhuak ve nghalin, Grand Slam title pasarih ngawt a lak tawhna Wimbledon-a kir direct nghal tawp loin warm-up event lamah inlan hmasa phawt se a duhpui tih a sawi a, chutih rualin, warm-up tournament khel lo pawh ni se pui takin a inlan leh nghal dawn tih a sawi a, US Open-ah hian mixed doubles lamah Roger Federer nen inkawp se a duh thu a sawilang tel nghal.