Wimbledon lalnu thar Swiatek bihchianna

Wimbledon lalnu thar Swiatek bihchianna
Karliamta Inrinni zana Wimbledon women’s singles title hlawhchhuak ve ta nge nge Poland chhuanvawr Iga Swiatek chuan a career-ah Grand Slam title paruk a sualchhuak tling ta a, a la champion lohna mual awmchhun chu Australian Open chiah a ni ta.
2025 final kan thlirliam takah khan Wimbledon leh Grand Slam final hrim hrima insawpna lian thei ber kan hmu a, Polish powerhouse khan American nula Amanda Anisimova lakah zahngaihna chhete mah lantir loin 6-0, 6-0 hnehna nen women’s tennis-a a chungnun (undisputed ruler a nih)-zia a pholang kal zel.
Kum 24-a upa Swiatek hi Wimbledon khelh lai khan WTA ranking-ah palina niin, seeding-ah khan pariatna a ni thung.
Grand Slam title a lak tawhte chu French Open pathum (2020, 2022, 2023, 2024); U.S. Open (2022) leh Wimbledon (2025)-te a ni.
Warsaw khawpuia piang Swiatek-i pa Tomasz pawh hi infiammi tho niin, Olympic rower a lo ni tawh a, Seoul khawpuiin 1988 Olympics a thlen tum khan men’s quadruple sculls-ah ram tan a lo bei ve tawh a ni.
Iga Swiatek hian a laizawnu, a u el phak a tumna vang hrim hrimin tennis bul a tan ve a, lo khel hmasa zawk a u chuan hun reilote junior circuit-ah a khel tih loh chu a thleng sang lo zawkah a tang zui ta a ni.
Tarlan tawh thin angin, kum 2018 khan Swiatek hi junior Wimbledon champion a lo ni ve tawh a, mahse, a puitlin hnu hian grass-court lamah a thlengsang mai thei ta lo tlat a, Paris lama a chetthat avangin clay-court specialist tih leh clay-court queen tia hriat lar a ni.
Swiatek hian kum 2016 khan ITF Circuit kaltlangin a professional career a tan a; kum 2019 khan a vawikhatna’n WTA final thlengin, Lugano khuaa Ladies Open final-ah hian chak zo ta lo mah se runner-up a nihna hmang chuan a hmasaber atan ranking lamah top 100 a luah chho.
2020 French Open final-a Sofia Kenin a hneh tum khan kum 1992 champion Monica Seles hnu lama women’s Roland Garros champion naupang ber a ni.
2021 Italian Open-ah a tumkhatna’n WTA 1000 title a sualchhuak a, a career-a a hmasaber ni turin ranking lamah top 10 a luah chho mai ni loin kha mi kum khan world number four ni chungin kum a khar.
April 2022 a ni a, Ash Barty khan tennis a chawlhsan tak avangin Pole pawh world number one a ni chho ve ta nge nge a.
A French Open title pahnihna a lak hmain Doha, Indian Wells, Miami, Stuttgart leh Rome kaltlangin WTA title panga a la zawn thak a; 2022 U.S. Open-ah a hardcourt Grand Slam title hmasaber a hlawhchhuak leh bawk.
Kum 2023 khan tournament chhunga set khat chiah hloh chungin French Open title a kawl lai a humhim a; kum kharna WTA finals-a a champion hmain Warsaw leh Beijing-ah a champion bawk.
Kum 2024 khan Doha leh Indian Wells-ah title lain, clay leilungah nuam a tawl zui a ni ber bawk a; French Open title humhim leha kum 2007 champion Justine Henin hnu lama Roland Garros hmeichhe singles title vawithum la zawn thei hmasaber a nih hma khan Madrid leh Rome-ah a zawnin WTA 1000 title a hlawhchhuak ngat bawk.
Nikum vek khan Polish player zinga tennis hmanga Olympic medal awrh hmasaber ni turin Paris 2024-ah bronze a dawng.
Anisimova a hneh rual khan Polish player zinga Wimbledon singles title hawn hmasaber a ni zui leh ta bawk.