December 1 kha World AIDS Day a ni a, Mizoramah pawh hman niin, Aizawlah chuan Vaivakawn YMA Hall-ah hman a ni.
Kum 1988 atang khan December 1 hi khawvel pumah AIDS natna dona leh he natna darh zel tur ven a tul zia inhrilhhriat thar na ni atan hman thin a ni a, Aizawla hmanpuitu Synod Family Guidance & Counseling Centre director Rev Lalsangbera chuan thil tha leh tha lo leh eng thil pawh hian innghahna bul a nei vek, tiin, World AIDS Day-ah pawh HIV leh AIDS natna chu chhungkaw inenkawlna fuh tawk loh vang a ni tih chu rilruah a lian ber a, chhungkaw nuam leh hlim neih ngaihpawimawh thar a tul tih a sawi. “Kan nunah thil tha lo tak nia lo thlengte inpawmthiam hmasak hi damna kailawn hmasa a ni a, khawvela mi vanduai berte chu vanduai bika inngaite an ni,” a ti.
Positive Women Network of Mizoram president Vanlalruati chuan kumin World AIDS day thupui “HIV hrik kai mekte leh kai mai thei dinhmuna ding lehzual, communities ten HIV donaah hian hma hruai rawh se” tih a nih angin, HIV kai mekten hrereng chunga midang an kaichhawn lohna turin theihtawp chhuah zel a ni a, damdawia inchiu thinte pawhin hriau inhmantawm loh atangin he natna darh tur hi a ven mai theih a ni, tiin a sawi.
Aizawla World AIDS Day hmannaah hian damdawia inchiu thin leh HIV natna kai mekte atangin an harsatna leh hun tawn chhoh dan ngaihthlak a ni a. AIDS natna avanga nunna chan tawhte hriatrengna pual leh HIV darh zel tur venna atana inpek tharna hun hmangin bati chhit a ni.
MSACS project director Dr Lalthlengliani chuan community hrang hrang – HIV hrik kai mekte, damdawi hmanga inchiu thinte, mahni mipatpui kawpthin leh hmeichhe inzuar thinte chu World AIDS Day programme tihlawhtling tura tha an thawh leh an inpekna zawng zawngah lawmthu a hrilh a. HIV kai mekten enkawlna (treatment) tha an dawn zel theih nan leh he natna hrik darh zel tur venna kawngah chak zawka ke pen tlangpui zel turin a sawm a ni.
-- Advertisement --
October 1990 atanga September 2023 inkar
4HIV kai mi 29514 an awm tawh a, heng zinga 2434 chu nu nau pai lai an ni.
4HIV kai hriatchhuah zinga 23857 chu damdawi – ART la turin an inziaklut a, heng zinga 685 chu naupang an ni. ART la zui ta 21303 an awm.
4HIV kaihhnawiha nunna chan 4703 an awm tawh.
4Kum bithliahah kum 25-34 inkarah HIV kai hmuh an tam ber a, 11358 (mipa 8204 leh hmeichhia 3154) an ni a, zaah 41.94 a ni.
4Kum 14 hnuailamah HIV kai 753 hmuh an ni tawh a, zaah 2.78 a ni. Kum 15-24 inkarah 5894 (m – 4009 & f – 1885) awmin, 21.77% a ni. Kum 35-49 inkar 7468 (m- 4737, f – 2731) a ni a, 27.58% a ni. Kum 50 chunglam 1607 (m – 1006, f – 601) a ni a, 5.93% an ni.