World Cup fans-in Fifa break an duh lo!

World Cup fans-in Fifa break an duh lo!
World Cup khelh meka inkhel entute hian first half leh second half-a player-te tui in chawlh (Hydration break) hi an ngai thei lo a, an boo khum hluah hluah thin a, hei hi engnge a chhan ni chiah, eng vanga he chawlh tawite hi ngai thei lo hman nge an nih thlir teh ang.
A chhan bulpui ber chu inkhel en tui lai, inkhel kal tluang laklawh laia volleyball game ang maia chawlh awm hi tha an tih loh vang leh Fifa hnen atanga inkhel tihchhuah man to tak taka leitute tan advertisement tihchhuah theihna hun siamsakna mai maia an ngaih vang a ni.
Kumin World Cup khelhna hmun North America hi nipui laiin ram lum tak a ni a, hei vang hian half time chawlh bakah minute thum chhung ve ve chawlh tawi vawi hnih siam a ni a, hei hi player-te hmakhaw ngaia kalpui a ni.
Sawiseltute chuan he three-minute break hian game flow a tibuai a, a karlaka fakna lo thun ve sek hi a ninawm ve hrim hrim bawk niin an sawi ber.
Tun World Cup khelh mekah hian Dallas, Toronto, leh Boston stadium-a inkhel entute chuan nasa takin intihthlandaihna chawlh hi nasa takin an boo khum ruih ruih a, a bik takin, Nilaini zan Dallas Stadium-a England leh Croatia inkhelh tum hydration break hmasa zawkah khan an boo nasa zual.
Mi thenkhat chuan Irag-in si an chhuah chhan pakhatah pawh hydration break hi an mawhpuh hial a ni!
Iraq khan Erling Haaland hoa inlan Norwegian-ho kha 0-0 an nihpui hnuah break a ni a, khelmual an luh leh atanga minute lina lekah si an chhuah zui ta mai a, hun a tawp meuh chuan 4-1-in an tlawm a; Middle East ram chetchhiat chhanah an tan mar theih lai taka chawlh a inrawlh kha an puh ta mai a ni!
Iraq tlawmna Boston Stadium-a an inkhelh lai boruak ni se a nuam tawk 23 degrees Celsius (73.4°F) lek a ni a, chawlh teivet kha tul lo hlea ngai pawl an kat nuk.
England fan pakhat chuan an ram inkhel zawh khan media zawhna chhangin, “An hydration break ve khan tinzawn a neih chu advertisement atanga pawisa tam zawk siamchhuah chiah a ni.
“He kan pawlte inkhelhna stadium-ah phei chuan intihdaih kha a tul reng reng lo. air condition awm lohna 90 degrees plus-ahte chuan inkhel se a tulte pawh chu a lo tul reng mahna,” a ti!
Three Lions supporter dang pakhat pawhin, “Stadium pawn lamah i awm a nih chuan hydration break-te chu i mamawh a ni mahna, mahse, air conditioned stadium chhungah khati ang mamawhna kha a awm lo.
“Inkhel kal tluang lai a tikhaihlak mai mai a ni. Football hi chu flow-a thui tak innghat a ni a, inkhel laklawh laia thildang tlakzehtir chi a ni ngai lo,” a ti ve bawk.