World Junior Badminton Championship khel tur Mizo rawlthar pahnih Sanga leh |hazuala
World Junior Badminton Championship khel tur
Mizo rawlthar pahnih
Sanga leh |hazuala
Kumin October thla hian thenawm Assam state khawpui Guwahati-a National Centre of Excellence-ah Yonex-Sunrise BWF World Junior Badminton Championship 2025 khelh a ni dawn a, khawvel huap badminton inelna lian hmachhawn thei tur hian Mizo rawlthar pahnih C. Lalramsanga leh H. Lalthazualate an in vaw tling.
August ni 9-14, 2025 inkar chhung hian championship khelhna tur hmun National Centre of Excellence, Guwahati-ah ngei selection trial kalpui mek niin, hetah hian Mizo player pathum, C. Lalramsanga, H. Lalthazuala leh Lalrempuiite koh an ni a, Mizo zinga Junior World Badminton Championship khel thei hmasa ber ni turin Sanga leh |hazualate an in tling.
C. Lalramsanga s/o C. Lungmuanpuia, Durtlang, tuna Mission Veng Badminton Club tana khel mek hi mixed doubles leh boy’s doubles-ah trial hmachhawn turin koh a ni a; mixed doubles-ah Taarini Suri nen tangdunin, vawi li khelhah vawi thum an chak a, khawvel huap inelna lian hmachhawn turin an tling. Boy’s doubles-ah hian Bjorn Jaison nen tangdunin, inelna an la hmachhawn mek a, an tlin leh tlin loh a la hriat loh deuh.
H. Lalthazuala s/o H. Zo- hmangaiha, Chanmari West, tuna Chanmari Shuttlers Club tana khel mek chu boy’s singles category-ah a inlan a; vawi li khelhah vawi thum chakin, India number one Ansh Negi pawh straight set-a a hneh zingah a tel! Khawvel huap inelna liana India ai awh turin a invaw tling chiang hle a ni.
He selection trial-ah hian Solo, Indonesia-a zawh fel tak Badminton Asia Junior Championship-a India aiawhtute bakah Badminton World Federation (BWF) leh Badminton Association of India (BAI)-a ranking nei sangte koh an ni (BWF top 20 leh BAI top 8 chin).
India rama a tha ber leh thiam ber berte’n India ai awh thei tura chungnung zawk nih an inchuhna boruak sang takah Sanga leh |hazualate hming a langsar. Member 28 awmna India team-ah an tel dawn a, North East India atanga tel thei awmchhun an ni bawk.
Lalrempuii d/o Albert Lalrosanga, Serchhip pawh girl’s doubles-ah inlanin Zenith Abbigail nen an tangdun a, vanduai zawkah an tang thung.
Mizoram Badminton Association chuan thuchhuah siamin, vawi tam tak Mizoram lo tihmingtha tawh thintu an player-te hi a chhuangin, an hlawhtlinnaah a lawmpui tak zet tih an sawi a; Mizoram leh India ram tihmingtha a, hlawhtlinna sang zawk leh ropui zawk dawn belh zel tura an inbuatsaihna kawngah hriselna tha nei a, Pathian malsawm tlaka an inpuahchah chhoh zel theihna’n duhsakna sang ber an hlan tih an tarlang.