World Kidney Day hmang

March 14 khan ‘World Kidney Day’ hman a ni a, he ni denchhen hian Mizorama a vawikhatna atan Synod Hospital Nephrology Department buatsaiha hun hman a ni.
Hmanpuitu Health & Family Welfare minister Lalrinpuii chuan kidney (kal) pawimawhna hriat a tul tih sawiin, kal natna laka inven dan sawi uar a tul tih a sawi.
“Zoram mipuiin nunphung hrisel kan mamawh a, kan taksa mamawh tawk insawizawi leh ei in tha eia in inzirtir a tul. Chu chuan tunlai natna hrang hrang – BP sang, zun thlum leh a dangte lakah min vengin kal hrisel tak neih nan a tangkai a ni,” a ti.
Health department-in NOC a pek chhuah behchhanin Covid hma kum 5 chhung khan kal chhia thlak leh enkawlna atana sum sen chu cheng vaibelchhe 28 a ni a, senso tisangtu ber chu Mizoramah kal thlakna awm lo hi a ni tih Lalrinpuii hian a sawi a. Mipui mimir, mirethei zawkte tan Mizoramah ngei Mizo doctor-te hmanga kal thlak a nih theih nan sawrkarin theihtawp a chhuah a, kal thlakna hmun leh hmanrua neih tumin hma lak mek a ni tih a sawi.
Kal natna benvawn (chronic kidney disease) nei tawhte tan District Hospital tinah Dialysis Centre dah tura hma lak niin, Aizawl, ZMC, Lunglei, Champhai, Kolasib-ah chuan dialysis tih theih a ni tawh tih a sawi bawk..
World Kidney Day hi kumtin March thla Ningani vawihnihnaah hman thin a ni a, kumin thupui chu “Kidney Health for all” tih a ni. Kidney Day pual hian dialysis tih ngai, kum 60 chuang tawhte hnenah thilpek hlan a ni.