WORLD ZOONOSES DAY 2024

Dr. Lallawmzuali Ralte
College of veterinary Sciences & A.H.,
Central Agricultural University, Selesih, Aizawl, Mizoram.

-- Advertisement --

6th July hi World Zoonoses Day a ni a, khawvel hmun hrang hrangah he ni hi urhsun takin hman thin a ni a. “Zoonoses” tih thumal hi Greek tawng atanga lakchhawn niin “zoon” tih chu “ran” tihna a ni a “noses” chu “natna” tihna a ni a, a awmzia chu “Natna – Ran leh mihring inkara inkaichhawn thei chi reng reng ho hi Zoonoses chu a ni”.
Kumin 2024 World Zoonoses Day thupui (Theme) chu “Preventing the spread of Zoonotic Diseases” tih a ni a, a awmzia chu ran leh mihring inkara natna inkaichhawn theih laka invenhim a tulzia inzirtir a ni. Mithiamten an chhut danin ran leh mihring laka natna inkaichhawn theih (Zoonotic diseases) hi 70% aia tam hmuhchhuah a ni mek a ni.
He World Zoonoses Day hi Scientist hmingthang tak French Biologist Louis Pasteura’n khawvela vaccine hmasa ber Ui â hri danna (Antirabies Vaccine) kum 1885 July 6th a hmuhchhuah hriat reng nana he ni hi hman a ni.
Zoonotic diseases lar zualte chu Tuberculosis te, Rabies te, Taeniasis (Vawk bawl/Bawng bawl te), Ringworm te, Brucellosis te leh a dangte an ni a, chuvangin mipui mimirte kan lo hrisel zel theih nan heng ran leh mihring inkara natna inakichhawn theih laka kan lo him chhoh zel theih nan kan inzirtir a, kan inhrilhhriat chhoh tlan hi a tulin a pawimawh takzet zet tawh a ni. Ran vulh leh ui leh zawhte te, ar leh sahuana kan ran enkawl zawng zawngte lak atanga awlsam taka natna kan kaichhawn loh nan kan fimkhur tlan a ngai em em a ni.
He Zoonoses natna laka kan lo him theih nana mimalin tih ve theih kan neihte chu:
1. Uluk taka kut sil fai thin:
Kan kutte hi uluk takin kan silfai reng tur a ni a, a bikin eitur khawih dawnte, eirawngbawl dawn te, zun leh ek thiar zawhah te leh naute leh damlo diaper thlak zawh te hian fai takin kut kan sil thin tur a ni.
2. Vector Control: Vector kan tih mai entirnan thosi, tho, saphihrik leh a dangte lakah kan inveng fimkhur thin tur a ni a, kan in leh a chhehvelte kan vawngfai thin tur a ni. A chhan chu heng vector te hi natna hrik (Bacteria, virus, parasites etc) nasa taka pudarh thintute an nih avangin.
3. Ei tur vawn thianghlim (Safe Food Handling):  Eitur chi reng reng thianghlim takin kan siamin kan vawnghim tur a ni. Thei leh thlai hel chite reng reng fai taka silfai hnuah kan ei chauh tur a ni. Ei tur reng reng hmun himah (entirnan Fridge-ah te) kan dah fel zung zung thin tur a ni.
4. Ran vulh te vawnthianghlim (Pet and Animal Hygiene): Ui leh zawhte te, ar leh ran kan vulhte thianghlim takin kan enkawl tur a ni a, an ek leh hnawmhnawkte kan thianfai reng tur a ni. Zun leh ek atang hian natna tam tak kan kaichhawn theih avangin.
  5. Chintawk neiin khawsak thiam a pawimawh (Limit Close Contact): Ui leh zawhte emaw ran bula kan awmin ei leh in te kan ti tur a ni lo a, tin, ran khawih zawhah emaw an zun leh ek kan then pahin ei leh in kan ti tur a ni lova. Sa hel kan khawih laiin ei leh in (a bikin kuhva, sahdah, tuibur etc) kan ti tur a ni lo. Tin, ui leh zawhte hmai a liah tir leh fawh te kan ching tur a ni lo, natna an lak atangin kan kai palh thei a ni. Ka lawm e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More