Xi Jinping-a’n thuneihna a la sawh nghet zel

Xi Jinping chuan China sorkar leh economy a thununna chu thuk zawka kalpui tumin Beijing-a China lawmaker thutkhawmnaah reform hrang hrang pawm a nih beisei a ni a.
Rubber-stamp parliament, National People’s Congress (NPC) thukhawm chuan Xi chu president term thumna chelh turin an pawm ang a, chu mai ni lovin Xi-an a thawhpui tur a thlanchhuahte chu an pawmpui zui bawk ang.
China chuan premier thar nei dawnin chu chu Xi tih loha thuneitu sang ber second-in-command a ni dawn a, tuna ni lai mek Li Keqiang chu Xi dodal ngam a nih avangin a chawl tawh dawn a ni.
Tuna China thuneitu sang inhmukhawmna hi ‘Two Sessions’ tia hriat lar niin kum tina neih thin a ni a. Kumin hian pawimawhna a neih chu palaite chuan Commuist Party leh state institution kalphung pawimawh tam tak chu an siam danglam dawn vang a ni.
China state media-in a tarlan dan chuan finance sector leh scientific and technology hnathawh lam chu nasa zawka thunun leh khuahkhirh a ni dawn a, hei bakah hian private business lamah ‘party-building work tihchak a ni ang’ a ti bawk a.
A awmzia berah chuan Chinese Communist Party leh sorkar inkungkaihna chu chiang lo zawka siam ni dawnin leh party-in private sector a thununna chu khauh zawka kalpui a ni dawn tihna a ni.
Tun hnaiah China chuan corruption crackdown tia sawiin nasa taka kalpuiin sumdawng thiltithei leh hausa pui puite chu an chin hriat lohin an bo hmak hmak a. Tun hnai lawkah pawh tech sector lama China top dealmaker langsar tak chu a chin hriat lohin a awm mek a ni.
Tunkara NPC meeting ah hian Xi leadership chu tihngheh zual a ni dawn a, China president atan mai ni lo, armed forces head-a thlan a ni dawn bawk a.
Nikum October thla khan Communist Party te chuan a term thum chelhna turin an leader-ah an lo thlang fel tawh bawk a. Kum sawm tam tak tradition anga an neih bawhchhiain Xi tih loh chu term thum chelh awm chhung chu Communist China leader hmasa ber Mao Zedong chauh a ni a. Kum 2018 daih tawh khan NPC meeting chuan Xi an term thum a chelh theih nan leh a dam chhunga leader a nih theih nan term limit siam te an lo paih bo tawh a ni.
Xi hian zero-Covid strategy avanga crakdown nasa tak kalpui vangin business sector tlahniam siam that leh vat chu tihmakmawhah a neih a ngai a. Ram pawn lamah chuan US nena inlaichnna chhe zual zel leh Ukraine indona leh tun hnaia spy balloon chungchang leh Russian leader Vladimir Putin nena inhnimhnaihna an neih avangin ngainat a hlawh lo zual hle thung.
NPC ah hian China chuan Premier thar puang dawn bawkin, Premier hi ram danga prime minister ang niin China economy mai bakah administration lama thuneitu sang ber a ni.
Premier atan hian Xi-an a mi rin ber nia ngaih zinga tel Li Qiang chu dah luih a nih rin a ni a. Shnaghai party secretary ni mek niin Shanghai-a Covid lockdown rei ngial kalpuitu kha a ni.
Hei bakah hian Xi cabinet tia ngaih theih tur Politburo Standing Committee member tur te lailanna neih a ni bawk ang a. A bik takin China-in commerce minister, head of national development and reform commission, propaganda chief leh head of state security te chu tute nge ni ang tih chu khawvel ngaihven a tling a. Xi chuan mithiam aiin amah leh party a rinawm te a thlan rinna a lian bawk.