Young Voters’ Festival nei

October 18-20 thleng awh tur Young Voters’ Festival chu Nilaini khan Govt Serchhip College ah neih tan a ni.
Festival hawngtu election officer Lalrinsanga Hnamte chuan thalai voter-te ti phur tura Young Voters’ Festival huaihawt a ni chu lawmawm a tih thu a sawi a. Election Commission-in voter zawng zawngten vote an thlak ngei theihnan tan a la a; tar chak lo, rualbanlo, hrisel lohna avanga polling station thleng thei lo turte tan pawh ruahmanna siam a ni a. Vote nei thar thalaite zingah pawh Systemic Voter Education and Electoral Participation (SVEEP) kaltlangin Electoral Literacy Club din niin, nasa takin tan lak mek a ni tih a sawi.
Ni thum awh festival-ah hian extempore speech, quiz, declamation contest, reels making contest, selfie contest, hashtag campaign, signature campaign, flyer making contest, on the spot essay writing contest, on the spot slogan writing contest, on the spot painting competition te neih a ni dawn.
Serchhip district-ah hian inthlanpui 2018-a neihah vote za zelah 85 dawn a tla a. Kuminah hian 90% a tlak theih nan tan lak a ni a. SVEEP leh ELC tangdun chuan project 90 a kalpui mek a ni.