Youth Icon Sangliana’n GIG Arena-ah 2025 Maruti Suzuki Dzire tlangzarh

Youth Icon Sangliana’n GIG Arena-ah 2025 Maruti Suzuki Dzire tlangzarh
Mizorama Maruti Suzuki dealership, GIG Motors chuan Edenthar-a an Arena showroom-ah Maruti Suzuki subcompact sedan Dzire thar an tlangzarh. Dzire thar tlangzarhnaah hian LPS Youth Icon Lalsangliana chu khuallian niin, ani hian car thar khuhhawnna a nei nghal a ni.
Maruti Suzuki Dzire thar hi showroom-ah Rs 6,79,000 atanga Rs 10,14,000 man te an ni. A man hi introductory price niin, December ni 31, 2024 thleng chauh introductory price hian an hralh ang. Dzire hi subscription basis, Rs 18,248 per month in a lei theih dawn bawk e.
Dzire hi tum lo an siamtharna (4th generation) a ni tawh a, four-cylinder K-Series engine kalsanin, three-cylinder Z-Series engine a hmang a, hetiang engine hi Swift-ah pawh an hmang. Dzire thar hian Global New Car Assessment Programme (GNCAP) five-star rating a nei a, Maruti Suzuki kutchhuakah chuan GNCAP 5-star rating nei thei hmasa ber a ni.
A lan danah Dzire thar hi an tidanglam nasa viau a, headlamp thar leh horizontal light neiin, a hmalam bumper an tithar a, a lang hriam deuh zawk a, fog lamp thar neiin, eight-spoke alloy wheels a nei thar bawk. A grille pawh a lang lian zawk a, tail lamp thar a nei bawk.
A chhunglam layout chu Swift thar nen a inang a, 9.0-inch infotainment display neiin, steering wheel, switchgear leh analogue dial te pawh Swift nen a inang. A feature langsar zualah chuan automatic climate control, wireless charging, engine start/stop button, rear AC vent leh electric sunroof (Dzire-ah a vawi khatna) te pawh a tel. A chuangte himna atan airbag paruk, ISOFIX child seat anchor, three-point seatbelt passenger panga tan leh anti-lock brake, seatbelt reminder system leh rear parking sensor te pawh a nei.
2025 Maruti Suzuki Dzire hian 1.2-litre, three-cylinder Z-Series engine neiin, 80.5 bhp leh 112 Nm torque pechhuak thei a ni a, 5-speed manual leh 5-speed AMT-ah duhthlan tur a awm bawk.