Youth Icon star Laldinpuia a thi

Youth Icon star Laldinpuia a thi
2007 Youth Icon top 7-a inhlangkai thei, Tualte khaw zaithiam, an khaw hming chawia a lar vanglaia Laldinpuia Tualte ti a hriat lar chu nimin zing dar 3 rik hma deuh khan Seventh Day Adventist Hospital, Seventh Day Tlang-ah a thi a, vawiin chhun dar 12-ah an khua Tualte-ah vui a ni ang. Dinpuia hian a nupui Thartei leh a fate pathum a kalsan a ni.
Kan thu dawnna chuan Laldinpuia a kal (kidney) leh a thin (liver) a tha lo niin a sawi. Dinpuia hi Thawhlehni khan damdawi inah dah luh a ni a, Thawhlehni zanah ICU-ah dah niin, Nilaini zingkar-ah a boral ta a ni.Dinpuia hi a thianten a bike an hman sak zawngin a chhuak a, chuta tanga a haw leh lam chu waithing shed-ah nikhaw hrelovin a awm a, a thiante pahnihin bawihsawmin damdawi inah hian an dah lut ta a ni.
Dinpuia hi 2007-a Youth Icon-a a telpui Joseph Lalthanpuia’n damdawi inah hian khawvar pui a, ani bakah hian 2016 Icon star Sangtea’n damdawi inah hian a awmpui bawk a, zingah 2016 Icon star tho Mimi Lalzamliani’n damdawi in a thleng thla ve leh bawk a ni.
Dinpuia hi damdawi in atangin Ainawn venga a chhungten zing dar 4:30-ah a ruang lain, hetah hian Joseph-a hian Icon aiawha thusawina leh tawngtaina hun a hmang nghe nghe a ni. Zing dar 6:30 velah Tualte panpui a ni a, nizan khan lumenpui niin, vawiin chhunah vui tur a ni.