YouTube-a vawi tluklehdingawn en hlawh thei music video ngah ber chu J Balvin a ni a, tunah chuan Ozuna’n a rawn nih rual ta. Anni pahnih hmaa record siamtu chu Justin Bieber a ni thin.
Ozuna music video ‘Siguelo Bailando’ chu YouTube-a vawi tluklehdingawn en a hlawh thar a, he Puerto Rican zaithiam hian YouTube-a music video vawi tluklehdingawn en hlawh thei 12 a nei tling ta a, J Balvin record a nih rual ta a ni. A video vawi tluklehdingawn en hlawh thei te hi a lead, featured artist emaw collaborator emaw anga a telna te an ni.
Latin superstar J Balvin hi nikum khan Black Eyed Peas a thawhpuina ‘Ritmo (Bad Boys for Life)’ chuan YouTube-ah vawi tluklehdingawn en hlawh tlingin, vawi tluklehdingawn en hlawh thei music video 11 nei Justin Bieber a lehpel a, tunah Ozuna nen record an siam dun ta a ni.
-- Advertisement --
‘Smack That’ video 1B view
Akon leh Eminem te hla hit ‘Smack That’ chuan YouTube-ah vawi tluklehdingawn en a hlawh ve leh ta. He hla hi 2006-a an tihchhuah tawh kha a ni a, February ni 8 khan vawi tluklehdingawn en a hlawh ve ta chiah a ni. He hla hi 2006 khan Billboard Hot 100-ah No.2 te a lo kai zak zak tawh a ni.
Scorpions ‘Wind of Change’ pawh 1B view a kai ta
1990-a Scorpions music video, a hunlaia khawvel huapa hla lar leh ngaihven hlawh ‘Wind of Change’ pawhin YouTube-ah vawi tluklehdingawn en a hlawh ve ta. He hla hi Billboard Hot 100 chart-ah No.4 te pawh a kai a, German artist Klaus Meine hian a hla hi 1989-a Moscow a tlawh tum a a phuah a ni. Scorpions hi khawthlang ram rock band zinga Russia-a perform thei pahnihna an ni a, Leningrad-ah show pui tak an nei.